Ndërkombëtari holandez pranon që ka goditur me thikë kushëririn: Kisha humbur besimin te drejtësia

Ish-lojtari ndërkombëtar holandez, Quincy Promes, pranoi për herë të parë se kishte goditur me thikë kushëririn e tij, një rrëfim i bërë nga avokatët e tij të rinj gjatë një seance paraprake të apelit. Promes, i cili kishte marrë dënim fillestar me një vit e gjysmë burg, ndryshon kështu strategjinë e mbrojtjes.

Përfaqësuar nga avokatët e njohur Gert-Jan Knoops dhe Carry Knoops, Promes pranoi se përdorimi i së drejtës për të heshtur gjatë fazës së parë të procesit ishte një vendim i pasaktë. Sipas mbrojtjes, lojtari “kishte humbur çdo besim te drejtësia dhe tani po merr mbështetje psikologjike.”

Ngjarja ndodhi në korrik 2020 gjatë një feste familjare në Abcoude. Në atë kohë, Promes akuzoi kushëririn për vjedhjen e bizhuterive të familjes, gjë që shkaktoi një përplasje të madhe. Sipas avokatëve, “Promes goditi një herë me një thikë gjatë asaj ngatërrese.” Mbështetja e tij ligjore thekson se akti mund të ketë ndodhur nën ndikimin e emocioneve të forta dhe ndoshta në vetëmbrojtje.

Carry Knoops shpjegoi se “frika dhe zemërimi i madh për mënyrën se si Promes u paraqit si kriminel nga drejtësia holandeze” e ndaloi më parë nga dhënia e deklaratave. Lojtari pretendon se ka përjetuar traumë gjatë arrestimit në Dubai, ku është marrë në pyetje për çështje që nuk kanë lidhje me të, përfshirë lidhjen e pretenduar me kriminelin në arrati Jos L., i njohur si Bolle Jos. Promes po ashtu deklaroi se ka dëgjuar të tjerët të torturohen në burg.