Egjipti pranon ftesën e Spanjës për miqësoren e 31 marsit

Egjipti ka pranuar zyrtarisht ftesën për të zhvilluar një ndeshje miqësore kundër Spanjës më 31 mars, duke zëvendësuar kështu përballjen e planifikuar më parë që u anulua për shkak të ndryshimeve në kalendarin ndërkombëtar.

Lajmi u konfirmua pasi Federata Spanjolle i dërgoi një ftesë federatës egjiptiane për të organizuar takimin në Spanjë. Vendimi përfundimtar erdhi pasi trajneri i kombëtares egjiptiane, Hossam Hassan, dha miratimin e tij për zhvillimin e kësaj ndeshjeje.

Në një deklaratë zyrtare nga Federata Egjiptiane u bë e ditur se stafi teknik dhe drejtuesit e ekipit kanë nisur përgatitjet dhe procedurat e udhëtimit drejt Spanjës, pasi organizimi i turneut miqësor që ishte planifikuar në Katar nuk do të zhvillohet.

Ndërkohë, Spanja e drejtuar nga trajneri Luis de la Fuente do të luajë edhe një tjetër miqësore gjatë kësaj dritareje të kombëtareve. Më 27 mars, “La Roja” do të përballet me Serbinë në ‘Estadio de la Cerámica’ në qytetin e Villarrealit.

Federata spanjolle reagoi shpejt për të gjetur kundërshtarë të rinj, pasi disa ndeshje të planifikuara në Katar u anuluan. Serbia ishte gjithashtu një nga skuadrat që mbeti pa kundërshtar pas anulimeve në Doha, ndaj u arrit marrëveshja për këtë përballje në Spanjë.

Ndeshja mes Spanjës dhe Egjiptit pritet të tërheqë vëmendje të madhe, pasi në radhët e skuadrës afrikane spikat një nga ‘yjet’ më të mëdhenj të futbollit botëror, Mohamed Salah.