‘Irani s’është lufta e NATO-s’/ Gjermania - Trumpit: S’do t'ju ndihmojmë të rihapni Ngushticën e Hormuzit!
Qeveria e Gjermanisë hodhi poshtë kërkesën e Presidentit të SHBA-së, Donald Trump, që aleatët e NATO-s të ndihmojnë në sigurimin e Ngushticës së Hormuzit, duke deklaruar se aleanca nuk kishte vend në luftë.
"Kjo luftë nuk ka të bëjë fare me NATO-n. Nuk është luftë e NATO-s", u tha gazetarëve në Berlin të hënën Stefan Kornelius, një zëdhënës i kancelarit gjerman Friedrich Merz. "NATO është një aleancë mbrojtëse, një aleancë për mbrojtjen e territorit të saj", shtoi ai.
Trump i kishte paralajmëruar aleatët e NATO-s të dielën se ata përballen me një "të ardhme shumë të keqe", nëse refuzojnë të ndihmojnë në sigurimin e Ngushticës së Hormuzit, duke i bërë presion Evropës që të mbështesë një përpjekje amerikane për të rihapur korridorin kyç detar.
Qeveria gjermane tha se nuk do të ndihmonte në atë përpjekje, për sa kohë që lufta vazhdonte.
“Për sa kohë që kjo luftë vazhdon, nuk do të ketë përfshirje, madje as në një opsion për ta mbajtur të hapur Ngushticën e Hormuzit me mjete ushtarake”, tha Kornelius, duke shtuar se nuk ishte në dijeni të një kërkese zyrtare nga qeveria amerikane drejtuar Gjermanisë për të marrë pjesë në një mision të tillë.
"Do të doja gjithashtu t'ju kujtoja se SHBA-të dhe Izraeli nuk na konsultuan para luftës dhe se Uashingtoni deklaroi në mënyrë të qartë në fillim të luftës se ndihma evropiane nuk ishte as e nevojshme dhe as e dëshiruar", tha Kornelius.
Merz i Gjermanisë fillimisht i mbështeti shumë më tepër sulmet e SHBA-së dhe Izraelit ndaj Iranit, sesa shumë nga kolegët e tij evropianë.
Ndërsa Presidenti francez Emmanuel Macron dhe udhëheqës të tjerë të BE-së dënuan sulmet SHBA-Izrael si të paligjshme, Merz udhëtoi për në Zyrën Ovale dhe i tha Trump se ishte “në të njëjtën faqe” për nevojën e rrëzimit të regjimit në Teheran.
Por, ndërsa lufta vazhdon dhe ndikimet ekonomike dhe të sigurisë së luftës në ekonominë më të madhe të BE-së bëhen më të qarta, Merz është bërë shumë më kritik ndaj sulmeve të SHBA-së dhe Izraelit, duke shprehur publikisht frikën e tij se Trump nuk ka strategji daljeje për t'i dhënë fund luftimeve në Gjirin Persik.
"Qëndrimi i Gjermanisë ka qenë gjithmonë se ne pajtohemi në parim me qëllimin, domethënë, sjelljen e një ndryshimi në situatën politike në Iran në mënyrë që të lehtësohet një zgjidhje paqësore për rajonin", tha Kornelius të hënën. "Megjithatë - dhe kjo është pika e dytë, e cila nuk është më pak e rëndësishme - ne kemi gjithnjë e më shumë pyetje në lidhje me rrugën e saktë për arritjen e këtij qëllimi."/ DPA News.