Rikthehen De Bruyne dhe Anguissa, Napoli mposht Torinon

Në javën e 28-të të Serie A, Napoli siguroi tri pikët në stadiumin “Maradona”, duke mposhtur Torinon 2-1. Ndeshja nisi menjëherë me ritëm të lartë për vendasit. Që në minutën e 7-të, Alisson Santos shënoi një gol spektakolar nga jashtë zone, duke mposhtur portierin Paleari dhe duke çelur rezultatin për Napolin. Vendasit vazhduan të kontrollonin lojën dhe pjesa e parë u mbyll me avantazhin minimal 1-0.

Edhe në fillim të pjesës së dytë Torino nuk tregoi shenja për të reaguar, ndërsa Napoli gjeti golin e dytë në minutën e 68-të. Elmas shfrytëzoi pasimin e Politanos dhe me një goditje të kthyer me rrotullim shënoi golin tipik të një lojtari që kthehet te ish-klubi i tij.

Në 15 minutat e fundit, Napoli u përball me disa probleme fizike, pasi Juan Jesus dhe Gilmour dolën të dëmtuar, por Conte kishte në dispozicion rikthimin e De Bruyne-s dhe Anguissa-s, që hyri në fushë në minutën e 46-të në vend të Vergara-s.

Torino arriti të shkurtonte diferencën në minutën e 87-të me një gol të Casadei-t nga një këndor, por kjo mbeti si goditja e fundit e mysafirëve.

Me këtë fitore, Napoli ngjitet në kuotën e 56 pikëve, vetëm një pikë larg Milanit, ndërsa Torino mbetet me 30 pikë. Suksesi i Napolit konfirmon formën e mirë të skuadrës së Conte-s dhe vendos presion mbi rivalët kryesorë në garën për titull.