Piranjat/ Ish-burri e denoncoi 1 vit më parë, arrestohet 35-vjeçarja me 5 emigrantë, fëmijët i kishte lënë vetëm në shtëpi

Më datë14 shkurt 2026, në kuadër të fazës së 7-të të operacionit “Relay”, zhvilluar nga Policia e Tiranës, u bë e mundur arrestimi i një shtetaseje, e cila kishte marrë në Vorë 5 emigrantë të paligjshëm. Automjeti u kap në afërsi të Lezhës dhe shoferja 35-vjeçare e cila kishte marrë 12.500 euro për këtë aktivitet të paligjshëm, është emër i njohur për redaksinë e “Piranjave”.

Bëhet fjalë për Elsona Çoba, ish-bashkëshortja e Albert Skurës, i cili 1 vit më parë bëri një denoncim ndaj saj, për rrëmbim të fëmijëve dhe zhdukje pa lënë gjurmë. Gjithçka ndodhi pasi Elsona e denoncoi Albertin për dhunë në familje dhe ai kreu 1 vit burg. Kur doli, nëna me 3 fëmijët e mitur ishte larguar në drejtim të paditur.

Në atë situatë të dëshpëruar, Alberti na kërkoi ndihmë për të gjetur vajzat dhe pas shumë përpjekjeve, me ndihmën edhe të institucioneve, arritëm të gjenim se ku strehoheshin dhe më pas nisëm një komunikim me nënën e tyre dhe avokaten e saj, derisa organizuam takimin e shumëpritur. Takim që Albertit ia hoqi disi mallin, por jo merakun për të voglat e tij. 

“Nuk dua që vajzat të ndjekin rrugën e ish-bashkëshortes. Këtu vinin makina, natën, deri këtu kam gjetur shenjat e rrotave të makinës. T’ju tregoj një emër që kanë shkruajtur kalamanjtë. Sepse Elsona më tradhëtonte edhe me një vrasës, s‘mund t‘ja them emrin, por mbiemrin ja kanë lënë këtu. Ela, Pula është mbiemri i vrasësit që ka bërë 15 vite burg për një vrasje, dhe telefoni. Çfarë do të thotë kjo? Që Ela flet në telefon me këtë. Është marrë me shumë nerëz të krimit këtu. Ela përdor fëmijët për t’u mbrojtur nga ligji se thotë “hajde se kam unë fëmijët dhe nuk më fusin në burg”. Sepse Ela do të trafikojë sirianë…”, tha asokohe z.Skura, duke kërkuar njëkohësisht edhe heqjen e kujdestarisë së nënës, kërkesë që do të shqyrtohet më 12 mars.

Menjëherë pas arrestimit të 35-vjeçares, fëmijët e saj të mitur u strehuan në qendrën Arsis, atje ku Alberti zhvilloi një takim me ta, por pa sukses. Vajzat ishin shumë të ftohta dhe shumë të largëta me të. Në kushtet në të cilat ndodhemi, ata fëmijë kanë nevojë vetëm për mbështetje dhe dashuri. E çështë më e rëndësishmja, të rifitojnë besimin e humbur tek babai i tyre. Nga ana tjetër, ndërkohë që hetimet vijojnë, më datë 17 shkurt, Gjykata e Tiranës i caktoi 35-vjeçares Elsona Çoba masën “arrest në shtëpi”, për shkak të rolit të saj prindërues, për 4 vajza të moshës nën 18 vjeç.

Jo vetëm ligjërisht, por edhe moralisht, një vendim i drejtë ky i Gjykatës, por pyetja që mbetet është: Cili do të jetë në afatgjatë fati i këtyre vajzave? Kur nga njëra anë nuk duan të jetojnë me babain e tyre, dhe nga ana tjetër, kanë pranë një nënë e cila është pjesë e një rrjeti kriminal i cili përfiton të ardhura në mënyrë të jashtëligjshme.