Islanda do të mbajë referendum më 29 gusht për rifillimin e bisedimeve të anëtarësimit në BE

Islanda do të mbajë një referendum më 29 gusht për të vendosur, nëse do të rifillojë bisedimet e saj të bllokuara për t'u bashkuar me BE-në, tha qeveria e saj të premten. 

Kryeministrja islandeze Kristrún Frostadóttir, e cila njoftoi datën në një konferencë për shtyp në Reykjavik, tha se votimi më në fund do të zgjidhte “një debat që ka qenë pezull mbi kombin islandez”. 

Vendi Arktik aplikoi për anëtarësim në BE në vitin 2009 mes një krize financiare, por i ngriu bisedimet në vitin 2013 pas një mosmarrëveshjeje mbi politikën e peshkimit dhe e tërhoqi zyrtarisht aplikimin e tij në vitin 2015. Është anëtare e Zonës Ekonomike Evropiane dhe pjesë e zonës së udhëtimit të lirë Shengen. 

Në muajt e fundit, Islanda — e cila zë një pozicion strategjik të rëndësishëm në Arktik, por nuk ka ushtri të përhershme — kishte shqyrtuar përshpejtimin e një referendumi mbi temën e ringjalljes së bisedimeve, siç raportoi POLITICO muajin e kaluar.

Sondazhet tregojnë se një shumicë e qartë e islandezëve mbështesin mbajtjen e një referendumi për rifillimin e bisedimeve, megjithëse popullsia është e ndarë në mënyrë më të barabartë nëse Islanda duhet t'i bashkohet BE-së.

Komisionerja e Zgjerimit e BE-së, Marta Kos, e theksoi tërheqjen e bllokut si garantuese e sigurisë ,në një kohë trazirash gjeopolitike.  

“Një vendim i rëndësishëm tani i pret popullit islandez”, tha Kos të premten  në një postim në X. “Në një botë që po ndryshon me shpejtësi, Bashkimi Evropian ofron një spirancë në një bashkësi vlerash, prosperiteti dhe sigurie.”  

Nëse referendumi është i suksesshëm, Islanda do të duhet të shkojë në një votim tjetër pasi të përfundojë negociatat e pranimit për t'u bashkuar me bllokun./ Politico.