Orbán shtrëngon kontrollet kufitare, ndërsa kriza e Iranit godet fushatën zgjedhore të Hungarisë

Kryeministri i Hungarisë, Viktor Orbán, ka urdhëruar kontrolle më të rrepta kufitare për shtetasit e huaj pas sulmeve amerikane dhe izraelite ndaj Iranit, ndërsa ai i konsideron gjithnjë e më shumë çështjet e sigurisë si një shtyllë qendrore të fushatës së tij zgjedhore.

Orbán ka argumentuar se konflikti i armatosur në Lindjen e Mesme paraqet rreziqe për Hungarinë, për sa i përket çmimeve të energjisë dhe sigurisë kombëtare. Analistët thonë se narrativa e tij se ai është ofruesi i sigurisë, mund të jetë e dobishme në prag të votimeve.

Në të njëjtën kohë, Orbán ka përshkallëzuar një mosmarrëveshje me Ukrainën mbi tubacionin Druzhba, një arterie kritike për furnizimin me energji të Hungarisë. Tubacioni u godit nga një sulm i dyshuar rus në fund të janarit dhe nuk është riparuar që atëherë.

Hungaria do të shkojë në kutitë e votimit më 12 prill në zgjedhjet parlamentare, në të cilat partia opozitare Tisza është përpara Fidesz të Orbán-it. Orbán e ka qeverisur Hungarinë me një shumicë absolute parlamentare që nga viti 2010.

Sfiduesi i tij kryesor, Péter Magyar, po zhvillon një fushatë agresive të fokusuar në koston e jetesës dhe inflacionin.

Orbán e portretizon veten si garant të sigurisë

Të shtunën e kaluar, pak pasi SHBA-të dhe Izraeli nisën sulmet e tyre ndaj Iranit, Orbán mblodhi kabinetin e tij të sigurisë dhe e rriti alarmin terrorist të vendit me një nivel. Pastaj, të enjten, kryeministri u takua me komitetin e tij koordinues kundër terrorizmit dhe urdhëroi kontrolle kufitare.

"Organizatat terroriste me origjinë nga Lindja e Mesme janë vendosur dhe janë forcuar në Evropën Perëndimore. Ne presim që ato të aktivizojnë qeliza terroriste në të gjithë Evropën. Ne do ta mbrojmë paqen dhe sigurinë e Hungarisë edhe në këtë situatë. Prandaj, kemi forcuar kontrollet mbi trafikun e pasagjerëve të huaj që mbërrijnë në Hungari", njoftoi Orbán.

Detajet e kontrolleve nuk ishin menjëherë të disponueshme. Orbán gjithashtu urdhëroi ushtarët dhe policinë të mbrojnë infrastrukturën kyçe energjetike të Hungarisë javën e kaluar, duke përmendur frikën e një sulmi nga Ukraina.

Sipas Bulcsú Hunyadi, një analist politik në Institutin e Kapitalit Politik të Hungarisë, përpjekja e Orbán-it për ta pozicionuar veten si garantues i sigurisë, mund të japë fryte.

“Konflikti me Iranin thellon pasigurinë, gjë që përputhet me narrativën se mjedisi është i paqëndrueshëm dhe se siguria po ofrohet nga qeveria dhe Fidesz”, tha Hunyadi.

"Kjo mund të lidhet lehtësisht edhe me rrëfimin se sa e rëndësishme është nafta ruse që mbërrin nëpërmjet Ukrainës, në mes të pasigurisë në rritje në tregjet e energjisë."

Hungaria aktualisht po bllokon paketën e kredisë prej 90 miliardë eurosh të Bashkimit Evropian për Ukrainën, për shkak të mosmarrëveshjes për tubacionin Druzhba. Budapesti akuzon Kievin për shantazh politik; Ukraina ka thënë se një armëpushim me Rusinë është një parakusht për riparimet.

Dániel Hegedus, zëvendësdrejtor i Institutit për Politikë Evropiane në Berlin, tha se çështja Druzhba mund të funksionojë gjithashtu në favor të Orbán.

“Zhvillimet aktuale kërcënojnë në thelb sigurinë energjetike të Hungarisë dhe mendoj se njerëzit po pyesin veten nëse mund të jetë në interesin e tyre që Ukraina të rifillojë transferimin në një afat të shkurtër”, tha Hegedűs.

Kriza mund të ketë efekte të kundërta

Megjithatë, kriza më e gjerë e energjisë në Evropë mund të kthehet kundër qeverisë hungareze, nëse çmimet mbeten të larta në javët në vijim. Tisza e Hungarisë po bën fushatë të fortë mbi çështjen e inflacionit dhe kostos së jetesës.

"Mund të fajësoni Ukrainën, Iranin, Amerikën dhe Bashkimin Evropian në planin afatshkurtër. Por nëse qeveria premton të mbrojë njerëzit dhe prapë nuk arrin ta përmbushë premtimin në praktikë, kjo mund të kthehet lehtësisht kundër tyre. Në planin afatgjatë, mendoj se ka rreziqe reale për qeverinë", tha Hunyadi.

Ai gjithashtu vuri në dukje se përplasja midis imazhit të Presidentit të SHBA-së Donald Trump në Hungari si një president i paqes dhe nisjes së mëvonshme të një fushate të re ushtarake, nuk mund të prishë domosdoshmërisht mesazhet e fushatës së Orbán-it.

"Kjo mund të shkaktojë disonancë njohëse në fushatë nëse do të kishte një figurë politike që do të zgjidhte ta shfrytëzonte atë. Deri më tani, nuk e kam parë Tiszën ta bëjë këtë një çështje të madhe", tha Hunyadi, duke shtuar se partia hungareze vazhdon të përqendrohet në shqetësimet e brendshme dhe deri më tani ka shmangur ndërhyrjen në territorin e politikës së jashtme./ Euronews.