SYRI TV/ 'Le të fillojë gjuetia' e Albes Fushës, kërkim artistik mbi ritin, trupin e përjetimin

Ekspozita “Le të fillojë gjuetia” e Albes Fushës në Galerinë FAB sjell një kërkim të gjatë artistik mbi ritin, trupin dhe përjetimin shpirtëror, përmes ndërthurjes së fotografisë dhe instalacionit. Projekti, i ndërtuar ndër vite, shndërrohet nga dokumentim në reflektim mbi përkushtimin dhe transformimin e njeriut në një dimension tjetër përvoje.

Ekspozita personale e artistit Albes Fusha, me titullin “Le të fillojë gjuetia”, vjen si një kërkim i thellë mbi raportin mes trupit, ritit dhe përvojës shpirtërore. Pas prezantimit në Orvieto të Italisë, projekti rikthehet në Tiranë, duke sjellë një proces artistik të ndërtuar ndër vite. Në qendër të kësaj ekspozite qëndron gjendja kalimtare, ajo pikë ku individi shkëputet nga përditshmëria dhe hyn në një dimension tjetër, ku koha, vetëdija dhe perceptimi transformohen. Përmes fotografisë dhe instalacionit, Fusha ndalet pikërisht në këto çaste, duke i kthyer në dëshmi të një përjetimi njëkohësisht individual dhe kolektiv.

Ky projekt shndërrohet në një reflektim artistik mbi përkushtimin dhe devotshmërinë njerëzore, duke e zhvendosur fokusin nga fakti drejt ndjesisë.

Në këtë ekspozitë, trupi bëhet vendi ku përqendrohet përjetimi, ndërsa riti shfaqet si një mekanizëm që krijon një gjendje të ndërmjetme, ku individi dhe kolektivi bashkohen në një përvojë të përbashkët.

“Le të fillojë gjuetia” është një kërkim mbi shpirtin, ku arti, në këtë formë, nuk rrëfen, por bëhet thellësisht ndjesor.