Çfarë dimë në ditën e tretë të sulmeve SHBA–Izrael ndaj Iranit: Kush sa është prekur

Një ditë pasi u konfirmua vrasja e Udhëheqësit Suprem të Iranit, Ajatollah Ali Khamenei, janë raportuar sulme në Dubai, Qipro dhe në të gjithë rajonin.

Një ditë pasi u konfirmua vrasja e Udhëheqësit Suprem iranian, Ajatollah Ali Khamenei, nga sulmet e Shteteve të Bashkuara dhe Izraelit, Irani vazhdon të godasë objektiva amerikane në rajonin e Gjirit.

SHBA-ja dhe Izraeli nisën sulme ndaj Iranit të shtunën, ndërkohë që ishin ende në zhvillim bisedimet mes Uashingtonit dhe Teheranit për programin bërthamor iranian. Irani u kundërpërgjigj po atë ditë me sulme me raketa dhe dronë në të gjithë rajonin, duke përfshirë objektiva në Izrael dhe asete ushtarake amerikane në Bahrein, Arabinë Saudite, Katar, Emiratet e Bashkuara Arabe dhe Irak.

Ndërsa tensionet vazhdojnë të rriten në ditën e tretë të konfliktit, ja si paraqitet situata të hënën.

Ja çfarë ka ndodhur deri në ditën e tretë

Në Iran

Agjencia gjysmëzyrtare iraniane Mehr raportoi se mbi 20 persona u vranë në një sulm në sheshin Niloofar në Teheran.
Presidenti amerikan Donald Trump tha në një intervistë për Fox News të dielën se operacioni i përbashkët SHBA–Izrael kishte vrarë 48 drejtues iranianë.
Të paktën dy persona u vranë në një "sulm armik" në qytetin qendror të Sanandaj, sipas agjencisë iraniane Fars.
Ministrja e Jashtme australiane Penny Wong tha për mediat lokale të hënën se Australia nuk planifikon t'i bashkohet fushatës ushtarake SHBA–Izrael kundër Iranit.

Në vendet e Gjirit

Të hënën në mëngjes u dëgjuan shpërthime në kryeqytetin e Emirateve të Bashkuara Arabe, Abu Dhabi, si dhe në Doha, kryeqyteti i Katarit.
Katari fillimisht përdori sistemin e mbrojtjes Patriot për të interceptuar raketat dhe dronët që hynin në hapësirën ajrore, por Ministria e Mbrojtjes njoftoi se tani po përdor avionë luftarakë për t'i rrëzuar mbi ujërat e Gjirit.
Ushtria e Kuvajtit njoftoi se mbrojtja ajrore kishte "përballuar dhe interceptuar" disa "objektiva ajrorë armiqësorë" në agim mbi pjesët qendrore të vendit.
Reuters, duke cituar një dëshmitar, raportoi për një re tymi pranë Ambasadës së SHBA-së në Kuvajt.
Copëzat ranë në rafinerinë Mina al-Ahmadi pranë qytetit të Kuvajtit, duke shkaktuar "lëndime të lehta te dy punonjës", sipas Agjencisë Zyrtare të Lajmeve të Kuvajtit.
Video të verifikuara nga Al Jazeera tregojnë tym të dendur në qytetin al-Jahra, 32 km në perëndim të Kuvajtit, pasi u pa një avion që u rrëzua.
Të dielën në mbrëmje, Ministria e Brendshme e Bahreinit raportoi se Irani kishte goditur një objekt detar pranë portit Mina Salman në Manama.
Të hënën, Ministria e Brendshme e Bahreinit tha në platformën X se mbetjet e një rakete të interceptuar kishin shkaktuar zjarr në një "anije të huaj" në zonën industriale të Salmanit.
Bahreini aktivizoi gjithashtu alarmet ajrore dhe u kërkoi banorëve të shkojnë në vendet më të afërta të sigurta.
Qatar Airways njoftoi se fluturimet mbeten të pezulluara për shkak të mbylljes së vazhdueshme të hapësirës ajrore.

Në Izrael

Ushtria izraelite tha se Irani ka lëshuar më shumë raketa drejt Izraelit dhe se sistemet e mbrojtjes ajrore po punojnë për t'i interceptuar ato.

Në SHBA

Sekretari i Mbrojtjes Pete Hegseth do të dalë në një konferencë për shtyp në orën 8:00 (13:00 GMT), hera e parë që një zyrtar i lartë i administratës Trump përballet me median që nga nisja e sulmeve.
Të dielën, ushtria amerikane njoftoi se tre ushtarë u vranë gjatë operacionit kundër Iranit, viktimat e para amerikane.
Në një video në platformën e tij Truth Social, Trump premtoi hakmarrje për tre ushtarët amerikanë të vrarë dhe paralajmëroi se mund të ketë më shumë viktima.
Trump paralajmëroi se operacionet luftarake kundër Iranit do të vazhdojnë derisa "të arrihen të gjitha objektivat".

Në Irak, Siri, Liban dhe Jordani

U raportuan sulme ajrore izraelite në periferitë jugore të Bejrutit dhe në jug të Libanit, sipas Agjencisë Kombëtare të Lajmeve të Libanit. Njëzet persona u vranë dhe 91 u plagosën në periferitë e kryeqytetit, ndërsa 11 u vranë dhe 58 u plagosën në jug të vendit.
Al Jazeera Arabic raportoi sulme izraelite në periferitë jugore të Bejrutit pasi Hezbollah kishte sulmuar Izraelin verior.
Copëza nga një raketë iraniane që ra në qytetin Ain Terma pranë Damaskut, në Siri, plagosën një burrë dhe tri vajzat e tij, sipas agjencisë shtetërore SANA.
Al Jazeera Arabic raportoi sirena alarmi në qytetin bregdetar Aqaba në Jordani.
U pa tym i dendur në Jordani pas raportimeve të pakonfirmuara për rrëzimin e një avioni amerikan F-15.

Në Qipro

Të dielën, kryeministri i Mbretërisë së Bashkuar, Keir Starmer, tha se kishte pranuar kërkesën e SHBA për të lejuar përdorimin e bazave ushtarake britanike për sulme "mbrojtëse" kundër Iranit, me qëllim ndalimin e sulmeve hakmarrëse me raketa. Mbretëria e Bashkuar ka dy Zona të Bazave Sovrane në Qipro: Akrotiri dhe Dhekelia, të cilat janë territore ligjërisht nën pronësi britanike brenda Qipros.
Të hënën, pak pas mesnatës, një dron Shahed goditi bazën e Forcave Ajrore Mbretërore britanike në Akrotiri, duke shkaktuar "dëme të kufizuara", sipas autoriteteve britanike dhe qipriote. / Al Jazeera – Syri.net