Vrasja e Khameneit/ Putin: Shkelje cinike e të gjitha normave morale dhe ligjore!

Presidenti rus Vladimir Putin dënoi  ashpër vrasjen e udhëheqësit suprem të Iranit, Ali Khamenei, dhe anëtarëve të familjes së tij si një shkelje cinike të të gjitha normave të moralit njerëzor dhe të drejtës ndërkombëtare.

"Ju lutem pranoni ngushëllimet e mia më të thella, në lidhje me vrasjen e Liderit Suprem të Republikës Islamike të Iranit, Sejjid Ali Khamenei, dhe anëtarëve të familjes së tij, e kryer në shkelje cinike të të gjitha normave të moralit njerëzor dhe të drejtës ndërkombëtare", tha udhëheqësi rus në një telegram drejtuar Presidentit iranian, Masoud Pezeshkian.

Teksti i telegramit është publikuar në faqen e internetit të Kremlinit.

"Ju kërkoj të shprehni ngushëllimet dhe mbështetjen time të sinqertë familjes dhe miqve të Udhëheqësit Suprem, qeverisë dhe të gjithë popullit të Iranit", shtoi Putin.

Më 28 shkurt, Shtetet e Bashkuara dhe Izraeli nisën një operacion ushtarak kundër Iranit. Qytetet kryesore iraniane, përfshirë Teheranin, u goditën. Shtëpia e Bardhë e justifikoi sulmin duke përmendur kërcënimet me raketa dhe bërthamore nga Irani.

Televizioni shtetëror iranian raportoi se Lideri Suprem i Iranit ishte vrarë. Sekretari i Këshillit Suprem të Sigurisë Kombëtare të Iranit, Ali Larijani, njoftoi se këshilli udhëheqës do të merrte përsipër detyrat e Liderit Suprem, derisa të zgjidhet një pasardhës i të ndjerit Ajatollah Ali Khamenei./ TASS.