Prishja e rrugëve në Librazhd/ Eksperti: Mungesa e studimeve dhe gërmimi në lumë, përshpejtuan shembjen

Në një intervistë për Syri TV me gazetaren Armela Ferko, eksperti mjedisor Abdullah Diku deklaroi se zona e Librazhdit njihet për strukturë të dobët gjeologjike dhe paqëndrueshmëri të lartë, veçanërisht gjatë reshjeve dhe ndërhyrjeve të pastudiuara.

Sipas tij, ndërtimi i infrastrukturës në këtë territor kërkon studime të thelluara gjeologjike dhe hidrogjeologjike, si dhe oponencë të rreptë teknike, elementë që, sipas tij, duket se kanë munguar. Diku theksoi se situata është përkeqësuar edhe nga marrja e inerteve në shtratin e lumit, duke dobësuar bazën natyrore të terrenit dhe duke rritur rrezikun e rrëshqitjeve masive.

Abdullah Diku: Atëherë, që në fillim dua të them që zona e Librazhdit është, si të thuash, e ndjeshme nga ana gjeologjike, pra janë struktura të dobëta për të mbajtur infrastrukturë rrugore, hekurudhore e të tilla të ngjashme. Pra njihet me atë zonën gjeologjike tipike të Librazhdit, ku vende-vende ky terren është realisht i dobët. I dobët dhe është gjithmonë dinamik, pra gjithmonë në raste reshjesh, në raste kushtesh atmosferike, në raste presioni apo ndërhyrjesh të pastudiuara, bëhet shumë i paqëndrueshëm, siç ishte dhe rasti i fundit ku segmenti kryesor i rrugës ra, u shemb.

Njeriu, institucionet, kompanitë, studiuesit, institutet, shkenca e tjerë, kanë mundësuar tashmë që në çdo lloj kategorie toke ti mund të ndërtosh. Ti mund të ndërtosh nëse bën projektin në mënyrën e duhur, ke oponencën teknike në mënyrën e duhur, bën zgjedhje teknike ashtu siç duhet dhe pastaj ndërtimi, elementi tjetër shumë i rëndësishëm, që arrin, si të thuash, të performojë me standartet e projektit. Më përpara kanë qenë këto, përveç institucioneve projektuese apo studiove të projektimit, kishte dhe oponent teknik. Pra, jo çdo kompani, jo çdo projektues mund të kalonte një projekt pa atë që quhet oponenca teknike. Pra një grup kolegësh të projektuesit apo të kompanisë projektuese të cilët analizojnë në detaje gjithçka. Projektuesi nuk është nuk është më i miri ndër to. Pikërisht, është një koleg i cili ka zgjedhur atë rrugën e projektimit, ndërkohë që këto që bëjnë oponencën, pra i japin mundësinë për ta përmirësuar projektin. Si nga ana hidrologjike, si nga ana hidrogjeologjike, gjeologjike, strukturore e tjerë.

Kjo gjë tashmë duket se nuk bëhet. Pra, një korridor kaq i rëndësishëm duhej bazuar mbi studimet më të fundit gjeologjike dhe hidrogjeologjike të zonës. Në infrastrukturë, në ndërtimin e digave të mëdhaja, në rrugë, në hekurudhë e të tjera, studimi gjeologjik dhe hidrogjeologjik janë A-ja. Mbi to është bazamenti që do të ndërtohet. Në këtë rast, nëse nuk është bërë, atëherë akoma më keq kjo gjë. Por ne e kemi përkeqësuar situatën e aksit në fjalë edhe për shkak të marrjes së inerteve në shtratin e lumit.

Pra çfarë ndodh? Në një në një strukturë të dobësuar, ti shkon e gërmon bazën e kësaj strukture, që është shtrati i lumit apo bregu i lumit, e ngarkon akoma më shumë këtë trupin e rrugës me struktura, me peshë tjetër që nuk ka qenë, me mure mbajtëse e të tjera, ushtron presion mbi të duke e dobësuar me plasje me lëndë eksplozive. Pra ti i krijon të gjitha kushtet e mundshme që mali, shpati të bjerë.