Vrasja e bosit më të fuqishëm i drogës në Meksikë/ Trump gjithashtu i përfshirë në mega-operacion

Nga Lisa Windolph, BILD

Goditje kolosale ndaj mafies së drogës në Meksikë!

Kreu i kartelit të pamëshirshëm Jalisco ka vdekur: Nemesio Rubén “El Mencho” Oseguera Cervantes (59 vjeç) humbi jetën të dielën gjatë një operacioni të madh.

Në fakt, ushtria meksikane donte ta arrestonte bosin e famshëm të kartelit në shtetin Jalisco. Por gjatë ndërhyrjes ndodhi një shkëmbim i ashpër zjarri. Katër anëtarë të kartelit u vranë, tre të tjerë u plagosën. Edhe “El Mencho” u qëllua. Ai vdiq më vonë në bord të një helikopteri ushtarak gjatë rrugës për në Meksiko.

Edhe tre ushtarë u plagosën. Gjatë operacionit u sekuestruan disa automjete të blinduara dhe armë – përfshirë edhe raketahedhës.

Kush qëlloi – kush e udhëhoqi operacionin?

Sipas Ministrisë së Mbrojtjes së Meksikës, ushtria udhëhoqi operacionin – e mbështetur nga aviacioni dhe njësitë speciale. SHBA-të ndihmuan me informacione inteligjence. Këtë e konfirmoi Karoline Leavitt, zëdhënëse e Donald Trump në Shtëpinë e Bardhë, në X, duke shpjeguar se “El Mencho” kishte qenë “në krye të listës së personave të synuar nga qeveritë e Meksikës dhe SHBA-së”.

Gjithashtu, “Joint Interagency Task Force-Counter Cartel” e udhëhequr nga ushtria amerikane, një njësi speciale e formuar në fund të vitit të kaluar për të hetuar rrjetet e kartelit, ka dhënë informacion për operacionin sipas një zyrtari të mbrojtjes së SHBA-së. Departamenti i Shtetit kishte vendosur më parë një shpërblim prej 15 milionë dollarësh (12.7 milionë euro) për informacione.

Megjithatë, një ish-zyrtar i DEA-s (Agjencia amerikane për luftën ndaj drogës) bëri të qartë: përgjegjësia operative për aksionin ishte plotësisht e Meksikës. Në një deklaratë, Ministria e Mbrojtjes e Meksikës tha se operacioni ishte “planifikuar dhe kryer” nga njësitë speciale të vendit.

Si reagoi karteli?

Menjëherë pas vdekjes së kreut të kartelit, situata u përshkallëzua në të gjithë vendin. Në 20 shtete, njerëzit e tij vunë zjarr, dogjën makina dhe bllokuan rrugët. Në Guadalajara u shpall gjendje emergjence. Nga frika, shumë banorë u mbyllën brenda shtëpive. Shkollat mbetën të mbyllura, forcat e sigurisë u vunë në gatishmëri kombëtare. Vala e dhunës arriti deri në kufirin me Guatemalën: ky vend forcoi menjëherë sigurinë e kufirit me Meksikën.

Në aeroportin e Guadalajaras, 328 kilometra larg, ndodhën skena tronditëse – në qytetin ku brenda pak muajsh do të zhvillohen katër ndeshje të Kupës së Botës. Departamenti i Shtetit të SHBA-së paralajmëron: “Kërkoni mbrojtje dhe qëndroni në vendbanimet tuaja”.