Witkoff: Trump kurioz pse Irani s’ka ‘kapitulluar’!

Presidenti i SHBA-së, Donald Trump, po vë në pikëpyetje pse Irani ende nuk ka “kapitulluar” përballë përforcimit ushtarak të Uashingtonit në Lindjen e Mesme, tha i dërguari special i presidentit amerikan, Steve Witkoff.

Witkoff i tha Fox News të shtunën se Trump ishte “kurioz” për qëndrimin e Iranit, pasi ai kishte paralajmëruar për një sulm të kufizuar ushtarak, nëse nuk arrihej një marrëveshje mbi programin bërthamor të Teheranit.

SHBA-të dhe aleatët e tyre evropianë, dyshojnë se Irani po përpiqet të prodhojë një armë bërthamore, gjë që Irani e mohon.

Brenda Iranit, protesta antiqeveritare u organizuan në disa universitete gjatë fundjavës - tubimet e para në një shkallë të tillë që nga goditja vdekjeprurëse e janarit nga autoritetet, e cila pati mijëra të vrarë.

Në intervistën e tij me Fox News, Witkoff tha: "Nuk dua të përdor fjalën 'i frustruar'... sepse ai [Trump] e kupton që ka shumë alternativa, por është kurioz pse ata nuk e kanë bërë këtë... Nuk dua të përdor fjalën..., por pse ata nuk kanë kapitulluar."

"Pse, nën këtë lloj presioni, me sasinë e fuqisë detare që kemi atje, pse nuk kanë ardhur tek ne dhe nuk kanë thënë: 'Ne deklarojmë se nuk duam armë, kështu që ja çfarë jemi të përgatitur të bëjmë?'"

"E megjithatë është e vështirë t'i çosh ata në atë vend", shtoi i dërguari i Trump.

Ministri i Jashtëm i Iranit, Abbas Araghchi, tha se besonte se kishte ende një shans që mosmarrëveshja të zgjidhej diplomatikisht, "bazuar në një lojë fituese për të dyja palët".

Ai i tha CBS News se negociatorët po punonin mbi elementët e një marrëveshjeje.

Të premten, Araghchi tha se Teherani po përgatiste "një draft të një marrëveshjeje të mundshme", dhe do t'ia dorëzonte atë Witkoff brenda pak ditëve të ardhshme.

Të martën e kaluar, zyrtarët amerikanë dhe iranianë zhvilluan bisedime indirekte në Zvicër, me qëllim frenimin e programit bërthamor të Iranit, duke thënë se ishte arritur përparim.

Pavarësisht kësaj, Trump tha dy ditë më vonë se bota do të zbulonte "gjatë 10 ditëve të ardhshme, ndoshta" nëse do të arrihej një marrëveshje me Iranin apo nëse SHBA-të do të ndërmerrnin veprime ushtarake.

Në javët e fundit, SHBA-të kanë rritur praninë e tyre ushtarake pranë Iranit.

Dislokimi përfshin anijen luftarake më të madhe në botë, USS Gerald R Ford, e cila duket se po shkon drejt rajonit.

Aeroplanmbajtësja USS Abraham Lincoln është vendosur gjithashtu në vend, së bashku me shkatërrues, anije luftarake dhe avionë luftarakë.

Në Iran, BBC ka verifikuar pamjet e demonstruesve që marshonin në kampusin e Universitetit të Teknologjisë, Sharif në kryeqytetin Teheran të shtunën. Ata u panë më vonë duke u përleshur me mbështetësit e qeverisë.

Protesta u raportuan edhe në universitete të tjera në Teheran dhe gjetkë.

Mediat iraniane raportuan se demonstrata u zhvilluan gjithashtu të dielën në Universitetin e Shkencës dhe Teknologjisë së Iranit dhe në Universitetin Khajeh Nasir Toosi në Teheran, si dhe në Universitetin Ferdowsi të Mashhadit në Iranin verilindor.

Në një video që BBC e ka verifikuar, protestuesit antiqeveritarë ngrenë flamurin e Luanit dhe Diellit - një simbol i Iranit para Revolucionit Islamik të vitit 1979 - në Universitetin Sharif. Njerëzit në turmë brohorasin "Javid Shah" ("Rroftë mbreti").

Një tjetër video e verifikuar tregon një turmë pro-qeveritare, që zhvillon një kundërprotestë në Universitetin Sharif, në të cilën po digjen flamuj amerikanë dhe izraelitë.

Përleshjet midis turmave pro dhe kundër qeverisë, shihen edhe në pamjet e verifikuara të filmuara në Universitetin e Teknologjisë Amirkabir.

Studentë nga universitete të ndryshme, janë mbledhur për të nderuar mijëra të vrarë nga autoritetet muajin e kaluar.

Agjencia e Lajmeve të Aktivistëve të të Drejtave të Njeriut (Hrana) me seli në SHBA tha se kishte konfirmuar vrasjen e të paktën 7,015 personave gjatë asaj vale, përfshirë 6,508 protestues, 226 fëmijë dhe 214 persona të lidhur me qeverinë. Shifrat e fundit u përditësuan më 15 shkurt.

Hrana tha gjithashtu se po hetonte 11,744 vdekje të tjera të raportuara.

Autoritetet iraniane thanë në fund të muajit të kaluar se më shumë se 3,100 njerëz ishin vrarë - por shumica ishin personel sigurie ose kalimtarë të sulmuar nga "protestuesit".

Presidenti Trump i ka mbështetur protestuesit në të kaluarën - në një moment duke u dukur sikur i inkurajon ata me një premtim se "ndihma është duke ardhur"./ BBC.