Soros financon grupin që nxit anulimin e jurive në Uashington

Nga Robert Schmad/

Disa nga fondacionet më të mëdha në botë po financojnë dy organizata jofitimprurëse që shërbejnë si organizatat mëmë të një grupi që inkurajon anulimin e vendimeve të jurisë dhe "mosbashkëpunimin" me forcat e rendit në kryeqytetin e vendit, sipas një rishikimi të deklaratave tatimore nga Washington Examiner.

Mes viteve 2020 dhe 2024, viti më i fundit për të cilin ka të dhëna, filantropi të njohura, fondacione të drejtuara nga donatorë të mëdhenj demokratë, grupe të lidhura me demokratët që operojnë me financime të errëta, sindikata të mëdha dhe organizata dhënëse grantesh të lidhura me familjen e megadonatorit liberal George Soros kanë derdhur rreth 40 milionë dollarë në Center for Community Change dhe Community Change Action, tregojnë dokumentet. Këto dy organizata shërbejnë si struktura mëmë për Free DC, një grup lokal që kritikët e akuzojnë se inkurajon anulimin e vendimeve të jurive në raste politikisht të ndjeshme.

Faqja e internetit e Free DC tregon se ai është një "projekt i veçantë i mbështetur financiarisht" nga këto dy organizata jofitimprurëse. Kjo do të thotë se Free DC funksionon brenda Community Change dhe Community Change Action dhe përfiton nga statusi i tyre i përjashtimit nga taksat, burimet administrative, fondet dhe shërbime të tjera, pa qenë e regjistruar vetë në IRS.

Megjithatë, jo të gjitha fondet e dhuruara për Community Change dhe Community Change Action shkojnë drejtpërdrejt për Free DC. Disa donacione janë të destinuara për projekte të tjera brenda rrjetit të organizatës. Analiza e Washington Examiner përfshiu vetëm kontributet e shënuara si "mbështetje e përgjithshme" ose me qëllime të ngjashme të gjera, pasi këto mbështesin infrastrukturën e përgjithshme nga e cila përfiton edhe Free DC.

Duke sqaruar këtë, një zëdhënës i Open Society Foundations i tha Washington Examiner se "Free DC nuk është përfitues i granteve nga Open Society Foundations dhe ne nuk e kemi financuar atë". Fondacioni ka dhënë fonde vetëm për Community Change dhe Community Change Action, të destinuara për qëllime të përgjithshme.

Prej muajsh, Free DC po organizon seminare të rregullta si pjesë e "Projektit të Informimit të anëtarëve të Jurisë", duke u mësuar pjesëmarrësve se si mund të "ndikojnë në rezultatet" në emër të barazisë, sipas faqes së grupit. Qëllimi i këtyre leksioneve është të informojë anëtarët e mundshëm të jurisë në Uashington se si mund ta përdorin detyrën e jurisë si një formë aktivizmi politik për të penguar administratën Trump, raportoi Washington Post.

Trajnimet për anëtarë jurie thuhet se kanë pjesëmarrje të lartë, ndërsa faqja e Free DC tregon se shpeshherë nuk ka më vende të lira. Një gazetar i Washington Post raportoi se rreth dy duzina personash morën pjesë në një prej këtyre aktiviteteve.

Ndërkohë që këto trajnime kanë vazhduar, vëzhguesit kanë vënë re një prirje në Uashington: persona të dyshuar për krime, ndaj të cilëve ka prova të qarta, nuk po paditen nga juritë e mëdha ose nuk po shpallen fajtorë në gjykim. Shpesh këta të pandehur akuzohen për sulme apo pengim të agjentëve federalë të zbatimit të ligjit të dislokuar nga administrata Trump.

Mungesa e padive, së bashku me provat që duken të qarta për krime të lidhura me përpjekje për të penguar administratën Trump, ka bërë që disa vëzhgues të dyshojnë për anulim të vendimeve të jurisë, një proces përmes të cilit juria mund të vendosë të lirojë një të pandehur nëse mendon se kjo është gjëja e duhur, pavarësisht se çfarë thotë ligji.

"A mund të sugjeroj një mundësi tjetër? Juritë e mëdha federale në Distriktin e Kolumbias, të përbëra (pothuajse) tërësisht nga kritikë të Presidentit Trump, po angazhohen në anulimin e përpjekjeve federale të administratës Trump për zbatimin e ligjit," shkroi Josh Blackman, profesor i drejtësisë në South Texas College of Law, për revistën Reason në gusht 2025. "Historikisht, të paktën, koncepti i anulimit të jurisë është parë si një kontroll popullor kundër qeverive tiranike. E imagjinoj se një banor mesatar i DC-së, që ka mundësi të marrë leje nga puna për të shërbyer për periudha të gjata në një juri të madhe federale, mund ta shohë veten në këtë mënyrë."

Në një rast, tri juri të mëdha në DC votuan kundër ngritjes së akuzës ndaj një gruaje që dyshohet se sulmoi një agjente të FBI-së jashtë burgut në DC gjatë një proteste kundër zbatimit të ligjeve të emigracionit, duke i shkaktuar asaj një plagë në dorë. Në një rast tjetër, një burrë i filmuar duke hedhur një sanduiç ndaj një oficeri të zbatimit të ligjit në DC nuk u akuzua për një vepër penale nga një juri e madhe dhe më pas u shpall i pafajshëm nga një juri tjetër për një kundërvajtje.

Një individ tjetër që një juri e madhe në DC refuzoi ta akuzonte ishte, sipas prokurorëve, i filmuar duke thënë se do ta "mbronte Kushtetutën me çdo mjet të nevojshëm", përfshirë "vrasjen e presidentit".

Edhe pse anulimi i vendimeve të jurisë konsiderohet nga shumëkush si një koncept radikal, organizatat mëmë të Free DC kanë marrë fonde nga disa prej emrave më të mëdhenj në filantropi.

Carnegie Corporation of New York, për shembull, i dha Community Change dhe Community Change Action 1.7 milionë dollarë mes viteve 2020 dhe 2024. David and Lucile Packard Foundation dha një shumë të ngjashme gjatë të njëjtës periudhë. Ford Foundation, një nga mbështetësit më të mëdhenj të rrjetit të këtyre organizatave, dha rreth 5.6 milionë dollarë.

Mbështetësi më i madh i deklaruar publikisht i Community Change dhe Community Change Action ishte familja Soros. Organizatat grantdhënëse të financuara dhe të kontrolluara nga familja Soros derdhën 13.4 milionë dollarë në këto dy organizata mes viteve 2020 dhe 2024. Organizata bamirëse të lidhura me Pierre Omidyar, një filantrop liberal që shpesh krahasohet me Sorosin, dhanë 600 mijë dollarë në mbështetje të tyre.

Edhe emra të tjerë të njohur në politikën demokrate dhanë fonde të konsiderueshme.

Heising Simons Action Fund dhe Heising Simons Foundation, të drejtuara nga një çift bashkëshortësh megadonatorë demokratë, dhanë afro 3.5 milionë dollarë për dy organizatat që mbështesin financiarisht Free DC.

Organizatat në rrjetin Tides, një nga strukturat më të mëdha të financimit të errët të lidhura me demokratët, dhanë mbi 2 milionë dollarë, ndërsa organizata që operonin në atë kohë nën rrjetin e ngjashëm Arabella Advisors dhanë rreth 2.5 milionë dollarë për Community Change dhe Community Change Action. Future Forward USA Action, organizata kryesore e financimit të errët që mbështeti ish-presidentin Joe Biden dhe më pas zëvendëspresidenten Kamala Harris në fushatat e tyre presidenciale, u dha gjithashtu dy organizatave 250 mijë dollarë në vitin 2024.

Edhe sindikatat kontribuuan, përfshirë American Federation of State, County and Municipal Employees, Chicago Teachers Union, International Union of Painters and Allied Trades, National Education Association dhe United Food and Commercial Workers International Union, të cilat dhanë dhjetëra mijëra deri në qindra mijëra dollarë për grupet që strehojnë Free DC.

"Kur këto grupe u thonë njerëzve të përdorin shërbimin në juri për të 'mbrojtur njerëzit tanë' dhe për të çuar përpara një kauzë politike, ato nuk po shpjegojnë në mënyrë neutrale detyrën qytetare," tha më herët për Washington Examiner Mike Davis, ish-këshilltar kryesor për emërimet i kryetarit të Komisionit Juridik të Senatit, Chuck Grassley (R-IA). "Ato po inkurajojnë anëtarë e mundshëm të jurive të shpërfillin ligjin dhe udhëzimet e gjyqtarit në favor të ideologjisë së majtë. Kjo është një përpjekje për të manipuluar rezultatet para se gjyqi të fillojë."

Free DC nuk iu përgjigj një kërkese për koment. / Washington Examiner – Syri.net