Putin takohet me ministrin e jashtëm kuban në Moskë: Kufizimet e SHBA-së, të papranueshme!

Presidenti rus Vladimir Putin u takua të mërkurën në Kremlin me Ministrin e Jashtëm Kuban Bruno Rodriguez, ku tha se kufizimet e reja të vendosura në ishullin e drejtuar nga komunistët, ishin "të papranueshme", njoftuan agjencitë shtetërore ruse të lajmeve.

Një diplomat i lartë rus tha javën e kaluar se Moska do t’i ofronte ndihmë Havanës, përfshirë ndihmë materiale, për të përballuar një përpjekje të SHBA-së për ta lënë ishullin pa naftë.

"Tani është një periudhë e veçantë, sanksione të reja. E dini si ndihemi për këtë", i tha Putin Rodriguez, sipas agjencisë së lajmeve TASS. "Ne nuk pranojmë asgjë të tillë."

Shefi i Kremlinit tha se marrëdhëniet midis Rusisë dhe Kubës, po zhvilloheshin "në një rrugë pozitive", raportoi TASS.

Ministri i Jashtëm rus, Sergei Lavrov i tha homologut të tij kuban në një takim të veçantë të mërkurën se Moska po i kërkonte SHBA-së të mos vendoste një bllokadë të plotë detare në ishull, dhe po mbështeste negociatat në vend të kësaj.

Dmitry Peskov, zëdhënësi i Putinit, u citua të thoshte nga TASS të mërkurën se Moska nuk e diskutoi çështjen e Kubës me Uashingtonin. Rusia, Ukraina dhe SHBA-të përfunduan bisedimet trepalëshe të paqes në Gjenevë më herët të mërkurën./ Reuters.