Takaichi rizgjidhet Kryeministre e Japonisë
Parlamenti japonez rizgjodhi sot Sanae Takaichi si Kryeministre të Japonisë, pas fitores dërrmuese të Partisë së saj Liberal Demokratike në zgjedhjet e jashtëzakonshme parlamentare më 8 shkurt.
Para fillimit të seancës së parlamentit japonez, kabineti i Sanae Takaichi paraqiti dorëheqjen kolektive në përputhje me Kushtetutën, pas së cilës ajo u konfirmua si kryeministre në një seancë të Dhomës së Përfaqësuesve, dhomës së ulët të parlamentit.Sipas agjencisë japoneze të lajmeve Kyodo, Takaichi pritet të prezantojë kabinetin e ri gjatë ditës.
Të gjithë ministrat nga qeveria e saj e parë, e formuar pasi ajo mori drejtimin e Partisë Liberale Demokratike (LDP) në tetor, do të mbajnë postet e tyre, përfshirë ministrin e jashtëm, ministrin e financave dhe ministrin e mbrojtjes.
Sonte, sipas raportimeve të medias, Takaichi është planifikuar të mbajë një konferencë për shtyp ku do të prezantojë, siç është njoftuar, një politikë fiskale "të përgjegjshme, por vendimtare", duke përfshirë një plan për një pezullim dy-vjeçar të taksës së konsumit mbi produktet ushqimore, të cilën LDP e premtoi gjatë fushatës zgjedhore.
Veterani i LDP-së dhe ish-ministri i drejtësisë, Eisuke Mori, u zgjodh Kryetar i Dhomës së Përfaqësuesve, ndërsa Keiichi Ishii nga partia kryesore opozitare, Aleanca e Reformës së Qendrës (CRA), u emërua Zëvendëskryetar i Dhomës së Përfaqësuesve.
Në zgjedhje, LDP fitoi një rekord prej 316 vendesh parlamentare nga një total prej 465 vendesh në dhomën e ulët, krahasuar me 198 që kishte para zgjedhjeve, duke e bërë këtë herën e parë që nga Lufta e Dytë Botërore që një parti fiton shumicën prej dy të tretash në atë dhomë, shpjegon Kyodo.
Takaichi thirri zgjedhje të parakohshme duke shpërndarë Dhomën e Përfaqësuesve më 23 janar, në fillim të seancës së rregullt, duke kërkuar të përfitonte nga mbështetja e lartë e qeverisë dhe të forconte pozicionin e bllokut qeverisës, i cili përfshin LDP-në dhe Partinë e Inovacionit të Japonisë (JIP), e njohur si Nippon Ishin.
Rezultati i zgjedhjeve është një nxitje e fortë për Takaichi-n dhe programin e saj, i cili përfshin masa fiskale ekspansioniste dhe një gatishmëri për të punuar për ndryshimin e Kushtetutës pacifiste, një qëllim i hershëm i LDP-së, sipas Kyodo-s.
Megjithatë, ndryshimet kushtetuese kërkojnë mbështetje prej dy të tretash në të dyja dhomat e parlamentit, si dhe konfirmim në një referendum.