Inter-Juventus hyn në histori para nisjes së ndeshjes, ‘Derby d’Italia’ vendos rekord të ri financiar

Sfida mes Interit dhe Juventusit ka hyrë në histori që përpara fishkëllimës së parë. “Derby d’Italia” i kësaj fundjave, i planifikuar për t’u luajtur në orën 20:45 në stadiumin San Siro, do të regjistrojë një tjetër “sold out” dhe do të bëhet ndeshja e dytë me të ardhurat më të larta në historinë e Serie A.

Pas shifrave të jashtëzakonshme të derbit kundër Milanit, nëntorin e kaluar, me mbi 75 mijë spektatorë dhe më shumë se 8.6 milionë euro të ardhura, edhe këtë herë interesimi i tifozëve ka qenë i jashtëzakonshëm. Sipas raportimit të ‘La Gazzetta dello Sport’, të ardhurat e pritshme për këtë përballje do të jenë afërsisht 8 milionë euro, duke konfirmuar fuqinë tërheqëse të klubit zikaltër në arenën italiane.

Për Interin ky është rekordi i gjashtë radhazi në dy sezonet e fundit, me klubin që mban aktualisht gjashtë vendet e para në këtë klasifikim të veçantë financiar. Një atmosferë madhështore do të shoqërojë duelin mes skuadrës së drejtuar nga Cristian Chivu dhe asaj të Luciano Spalletti, në një ndeshje që premton spektakël si në fushë, ashtu edhe në tribuna.

Inter-Juventus konfirmohet kështu si një nga ngjarjet më të mëdha sportive të sezonit, duke bashkuar pasionin, rivalitetin dhe shifrat rekord në një mbrëmje historike.