‘Kaska e përkujtimit’/ Sportisti ukrainas përjashtohet nga Lojërat Dimërore: Ky është çmimi i dinjitetit tonë!
Piloti ukrainas i skeletonit, Vladyslav Heraskevych, është përjashtuar nga Lojërat Olimpike Dimërore në Milano-Cortina 2026 pasi refuzoi të hiqte dorë nga përdorimi i një kaske që përmbante imazhet e sportistëve ukrainas të vrarë gjatë luftës me Rusinë. Komiteti Olimpik Ndërkombëtar (KON) deklaroi se Heraskevych nuk respektoi “udhëzimet për shprehjen e sportistëve”.
Heraskevych kishte insistuar që të vazhdonte të përdorte kaskën gjatë garës së skeletonit për meshkuj, duke synuar të nderonte sportistët e vrarë që nga pushtimi rus i Ukrainës në vitin 2022. Ky veprim u mbështet edhe nga presidenti ukrainas, Volodymyr Zelensky, por megjithatë piloti u përjashtua.
Në një deklaratë, KON njoftoi: “Pasi iu dha një mundësi e fundit, piloti ukrainas Vladyslav Heraskevych nuk do të mund të nisë garën e tij sot në Lojërat Olimpike Dimërore 2026. Ky vendim u mor nga juria e Federatës Ndërkombëtare të Bobsleigh-it dhe Skeletonit (IBSF), pasi kaska që ai kishte planifikuar të përdorte nuk ishte në përputhje me rregullat.”
Sportistët lejohen të shprehin mendimet e tyre në konferenca për shtyp dhe në rrjetet sociale. KON-i kishte bërë përjashtim për Heraskevych, duke lejuar përdorimin e një shiriti të thjeshtë të zi në garë, por piloti e refuzoi këtë kompromis. Presidentja e KON-it, Kirsty Coventry, foli me të në mëngjes për ta bindur që të ndryshonte vendimin, por ai qëndroi i vendosur.
Sportisti ukrainas i përjashtuar ka reaguar me një mesazh në rrjetet sociale, ku ka shkruar: Ky është çmimi i dinjitetit tonë.
Heraskevych ka një histori të gjatë të shprehjes së qëndrimeve të tij kundër luftës; në Lojërat Olimpike të Pekinit ai kishte mbajtur një pankartë me mbishkrimin “No War in Ukraine”, vetëm disa ditë para se Rusia të sulmonte Ukrainën.