Lazio në gjysmëfinale të Kupës së Italisë, Bologna eliminohet pas penalltive

Lazio është kualifikuar në gjysmëfinale të Kupës së Italisë pas një ndeshjeje dramatike ndaj Bologna-s, e vendosur vetëm nga goditjet e penalltive. Koha e rregullt përfundoi në barazim 1-1, ndërsa portieri Ivan Provedel u bë heroi i bardhekaltërve nga pika e bardhë.

Bologna e nisi ndeshjen më mirë dhe dominoi pjesën e parë. Skuadra vendase krijoi disa raste të rrezikshme dhe kaloi në avantazh në minutën e 30-të me golin e Castro-s. Pak më vonë, Bologna ishte shumë pranë golit të dytë, por goditja e vendasve u ndal nga traversa. Lazio hasi vështirësi në këtë pjesë dhe nuk arriti të reagonte si duhet.

Në fillim të pjesës së dytë, ndeshja ndryshoi rrjedhë. Noslin, i futur në lojë si zëvendësues pas një dëmtimi te Lazio, barazoi shifrat në minutën e 49-të. Pas këtij momenti loja u bë më e ekuilibruar, me të dy ekipet që kërkuan golin e fitores, por pa sukses. Koha e rregullt u mbyll në barazim dhe gjithçka u vendos me penallti.

Nga pika e bardhë shkëlqeu Provedel. Portieri i Lazios priti penalltinë e Ferguson dhe ndaloi edhe goditjen e Orsolinit. Lazio u tregua e saktë në ekzekutimet e saj dhe fitoi serinë e penalltive me rezultatin 4-1.

Me këtë sukses, Lazio siguron një vend në gjysmëfinale, ku do të përballet me Atalantën. Në çiftin tjetër gjysmëfinalist do të ndeshen Interi dhe Como. Për Bologna-n, kjo humbje thellon momentin e vështirë që po kalon skuadra.