Vizita e presidentit izraelit shkakton kaos në Australi, policia përleshet me protestuesit
Policia australiane ka mbrojtur veprimet e saj pas përplasjeve të dhunshme me protestuesit gjatë një demonstrate të mbajtur në Sidnej, kundër vizitës së presidentit të Izraelit, Isaac Herzog. Ngjarja ka shkaktuar reagime të forta publike pasi në rrjetet sociale u shpërndanë video që tregonin policë duke vrapuar drejt turmës, duke goditur me grushta protestues dhe duke larguar me forcë disa persona, përfshirë burra myslimanë, që po luteshin.
Protesta u zhvillua të hënën në mbrëmje pranë Bashkisë së Sidneit. Sipas policisë së Uellsit të Ri Jugor (NSW), në protestë morën pjesë rreth 6,000 persona, ndërsa organizatorët e tubimit thanë se numri ishte shumë më i lartë, deri në 50,000. Gjatë përplasjes u arrestuan 27 persona, nëntë prej të cilëve u akuzuan zyrtarisht, ndërsa policia raportoi se 10 oficerë u sulmuan dhe u plagosën. Mes të lënduarve ishte edhe një deputet i parlamentit lokal.
Komisioneri i Policisë së NSW, Mal Lanyon, deklaroi të martën se oficerët kishin treguar përmbajtje të jashtëzakonshme dhe se bënë atë që duhej bërë për të ruajtur rendin dhe sigurinë publike. Ai theksoi se situata ishte e vështirë dhe se policia veproi brenda kompetencave të saj ligjore.
Nga ana tjetër, organizatorët e protestës dhe grupet pro-palestineze kanë dënuar ashpër dhunën policore. Josh Lees, nga grupi Palestine Action Group, tha se ajo që ndodhi të hënën në mbrëmje ishte dhuna më e rëndë që kishte parë në vitet e fundit. Ai deklaroi për radion publike australiane ABC se protestuesve duhet t’u ishte lejuar të marshonin paqësisht.
“Sikur të na ishte dhënë e drejta të marshonim, kjo mund të ishte shmangur”, tha Lees. Sipas tij, grupi kishte kërkuar të marshonte nga Bashkia e Sidneit drejt parlamentit lokal ose Hyde Park, por kjo kërkesë u refuzua nga autoritetet.
Qeveria e NSW kishte vendosur kufizime të reja për protestat publike pas një sulmi antisemit të ndodhur në dhjetor në Bondi Beach, ku 15 persona, përfshirë një vajzë 10-vjeçare, humbën jetën pasi dy persona të armatosur qëlluan mbi turmën gjatë një eventi që shënonte festën hebraike të Hanukkah. Pas këtij sulmi tragjik, autoritetet forcuan ligjet për tubimet publike dhe pak ditë para protestës së fundit shpallën masa shtesë për të ashtuquajturat “ngjarje madhore”, duke i dhënë policisë më shumë fuqi për të kufizuar lëvizjen dhe për të mbyllur zona të qytetit.
Këto rregulla lejonin tubime statike, por ndalonin marshimet. Organizatorët e protestës u përpoqën ta kundërshtonin këtë vendim në gjykatë, por humbën betejën ligjore vetëm gjysmë ore para fillimit të protestës.
Vizita e presidentit izraelit Isaac Herzog u organizua nga qeveria australiane si një gjest solidariteti ndaj komunitetit hebre, me synimin për të ndihmuar në shërimin e tij, pas sulmit antisemit. Megjithatë, ftesa u kundërshtua nga grupe pro-palestineze, të cilat e shohin vizitën si provokuese në kontekstin e konfliktit në Lindjen e Mesme.