‘Isha pastor, tani jam pastrues’-Iriqi bisedon me Toni Gogu

Iriqi:-Në këtë qeveri ti je ministër? Çfarë mbulon?

Gogu:-Mbuloj dyshemenë kur eci. Po ç’e ke këtë pyetje, o Iriq?!

Iriqi:-Po çdo ministër ka sektorin e vet. Ti cilin sektor mbulon?

Gogu:-Mbuloj sektorin e sms-së. Më shkruan Rama e unë bëj ato që lexoj.

Iriqi:-Po pse quhesh ministër?

Gogu:-Që të më bëjnë me rëndësi. Se shpesh qeshin me mua. Jo vetëm opozita, edhe nga qeveria. Pandehin se fjalët që them dalin nga mendja ime. Nuk e dinë që i ka nxjerrë Rama.

Iriqi:-Pra të qeshin me Ramën, po thua?

Gogu:-Kur nuk e kemi Ramën pranë tallemi gjithë ditën me të. Ka broçkulla me okë. Sot thotë shi, nesër e mohon, thashë diell bërtet.

Iriqi:-Ke marrëdhënie celulari me të. Kaq?

Gogu:-Me të gjithë veç me celular flet ai. Askush nuk e takon. Një ditë i shkova në zyrë për një sqarim e s’më priti.

Iriqi:-Çfarë sqarimi?

Gogu:-Po ja, në çdo mesazh që më nis më quan Dogu. Kaq herë i kam thënë, shkruaje Gogu, por nuk e korrigjon.

Iriqi:-Ke qenë pastor, pse erdhe në politikë?

Gogu:- Aty pranë jam. Nga pastor u bëra pastrues. Me P fillon.

Iriqi:-Pastrues?

Gogu:-Po, pastroj gafat dhe dëmet e Ramës. Vërtet nuk mbulohet e keqja me fjalë, por shoh tymin tim të ecë drejt.

Iriqi:-Ndjen që mëkaton pra?

Gogu:-Po, ndaj sa herë gënjej shkoj e lutem. Dhe ndjehem gjeth dhe gati për rrenën e rradhës.