Tragjedia e rëndë në Itali: Ja familja që u shua tragjikisht

Një ngjarje thellësisht tronditëse ka prekur komunitetin shqiptar dhe opinionin publik në Itali. Një familje shqiptare me katër anëtarë ka humbur jetën tragjikisht si pasojë e helmimit nga monoksidi i karbonit, në banesën e tyre në Itali.

Viktimat janë Arti Kola, 48 vjeç, bashkëshortja e tij Jonida Kola, 43 vjeçe, si dhe dy fëmijët e tyre, Hajdari 22 vjeç dhe Xhesika, vetëm 15 vjeçe. Familja ishte me origjinë nga qarku i Elbasanit.

Sipas mediave italiane, alarmi është ngritur nga vëllai i kryefamiljarit, pasi përpjekjet e tij për t’i kontaktuar me telefon kanë rezultuar pa përgjigje. I shqetësuar, ai është drejtuar drejt banesës trekatëshe, ku së bashku me dy efektivë të karabinierëve kanë hyrë me forcë brenda. Aty janë përballur me një skenë të rëndë: katër trupat e pajetë të shtrirë në dysheme.

Dyshohet se ngjarja ka ndodhur rreth orës së darkës. Ekipet e shpëtimit kanë gjetur tryezën të shtruar, çka tregon se familja ishte mbledhur për të ngrënë së bashku, në momentet e fundit të jetës së tyre. Dy karabinierët që ndërhynë për ndihmën e parë shfaqën shenja të lehta helmimi, por fatmirësisht ndodhen jashtë rrezikut për jetën.

Autoritetet italiane kanë nisur hetimet për të zbardhur plotësisht rrethanat e kësaj tragjedie dhe për të verifikuar gjendjen e sistemit të ngrohjes, i cili dyshohet se ka shkaktuar rrjedhjen fatale të monoksidit të karbonit.