U dëbua nga Italia/ 42-vjeçari shqiptar u fut ilegalisht me mbiemrin e gruas, karabinierët e ‘kapin mat’ në Rimini

Karabinierët italianë arrestuan një 42-vjeçar shqiptar, i cili ishte kthyer ilegalisht në Itali pavarësisht se ndaj tij ishte lëshuar një urdhër dëbimi.

Pasditen e së martës, 3 shkurt, karabinierët, gjatë një patrullimi, kontrolluan një makinë me targa të huaja dhe dy burra në të në një rrugë anësore në lagjen Torre Pedrera.

Burri, pavarësisht se kishte paraqitur patentën dhe pasaportën origjinale shqiptare, nuk ishte në gjendje të provonte praninë e tij në vend, pasi i mungonte leja e qëndrimit, raportojnë mediat italiane.

Pasi kryen një kontroll paraprak në vend, i cili megjithatë konfirmoi dyshimet e ngritura në lidhje me të dhënat personale, karabinierët e çuan 42-vjeçarin në kazermë për hetime të mëtejshme.

Autoritetet zbuluan se shqiptari, i ishte nënshtruar një urdhri dëbimi me ndalim rihyrjeje në territorin italian, të lëshuar në vitin 2023 nga Selia Qendrore e Policisë së Barit. Për të anashkaluar urdhrin, pasi u riatdhesua, ai ishte martuar në Shqipëri, duke marrë mbiemrin e gruas së tij.

Falë të dhënave të ndryshme personale, ai kishte marrë dokumente të reja identiteti, me të cilat kishte hyrë ilegalisht në Itali, i bindur se nuk do të zbulohej.

42-vjeçari shqiptar  u arrestua më pas për shkelje të rregulloreve të imigracionit dhe, me urdhër të Prokurorisë Publike të Riminit, u mbajt në qelitë e paraburgimit të Stacionit të Karabinierëve në pritje të një gjyqi të shkurtuar të planifikuar për mëngjesin e kësaj të mërkure.