Albacete ia bën të vështirë, por Barcelona kualifikohet në gjysmëfinale të Kupës së Mbretit

Barcelona arriti të kualifikohej jo pa vështirësi në gjysmëfinale të Kupës së Mbretit, pasi mposhti Albaceten me rezultat 2-1 në transfertë.

Goli i parë erdhi në minutën e 39-të të pjesës së parë. Një kombinim i shkëlqyer mes Frenkie de Jong dhe Lamine Yamal i dha këtij të fundit mundësinë për të gjuajtur nga afër zonës. Yamal nuk e humbi shansin dhe vendosi rezultatin në 0-1.

Në fillim të pjesës së dytë, Barcelona bëri ndryshimin e parë, duke hedhur Pau Cubarsi në fushë në vend të Joao Cancelo-s.

Goli i dytë për "blaugranat" erdhi në minutën e 56-të. Pas një krosimi të Marcus Rashford, Ronald Araujo goditi saktë me kokë në mes të portës, duke dyfishuar epërsinë.

Përpjekjet e Albacetes për të shkurtuar distancën u ndalën në minutën e 84-të, kur një gol i shënuar nga Jefte Betancor u anulua për pozicion jashtë loje.

Megjithatë, në minutën e 87-të, goditja e lirë e Jose Lazo-s (i cili sapo kishte hyrë në fushë) gjeti kokën e Javi Moreno-s, i cili realizoi një gol të shkëlqyer, 1-2.

U duk se Barcelona mbylli çdo diskutim kur në minutën 90+1', Ferran Torres shënoi golin e tretë, por ndërhyrja e VAR-it, duke e anuluar por pozicion jashtë loje, e mbajti ndeshjen të hapur deri në sekondat e fundit. Festa në fund ishte për skuadrën e Hansi Flick, që i gëzohet një kualifikimi jo pak të vështirë.