PSG nis bisedimet për rinovimin e kontratës me Luis Enrique

Klubi francez PSG ka nisur tashmë negociatat për të rinovuar kontratën e trajnerit Luis Enrique, e cila skadon në qershor 2027, raporton Le Parisien. Klubi e konsideron vazhdimësinë e spanjollit një prioritet absolut, ndërsa i afërmi i tij ka deklaruar se Enrique është ‘shumë i lumtur në Paris dhe te PSG’.

Me më pak se një vit e gjysmë deri në përfundimin e kontratës aktuale, e ardhmja e trajnerit 55-vjeçar është sërish temë qendrore. PSG synon të ndërtojë të ardhmen me Enrique-n në stol, i cili konsiderohet ‘trajneri më i mirë në botë’ nga drejtuesit e klubit, një status i forcuar nga gjashtë titujt e fituar gjatë vitit 2025. Largimi i tij nuk është një opsion i marrë parasysh.

Luis Enrique ka transformuar skuadrën sipas vizionit të tij, duke besuar te talentë të rinj si Dro Fernandez, 18-vjeçari i sapo transferuar nga Barcelona me kontratë deri në vitin 2030. Prania e tij shihet si kyçe për stabilitetin dhe rritjen e ekipit.

Presidenti Nasser Al-Khelaifi e konsideron emërimin e Enrique-s si pasues të Galtier si vendimin më të mirë të mandatit të tij, ndërsa trajneri bashkëpunon ngushtë me këshilltarin sportiv Luis Campos.

Rreth një vit më parë, Luis Enrique shprehu dëshirën për të qëndruar në Paris: ‘Të qëndroja 10 vjet? Shpresoj po, por realiteti është që është shumë e vështirë të qëndrosh kaq gjatë në një klub të lartë. Në klubet e mëparshme nuk kam qëndruar më shumë se katër vite. Këtu është një projekt krejt ndryshe, ndihem shumë mirë dhe komod. Do të ishte fantastike nëse aventura ime këtu do të zgjaste 10 vjet’.