Ranë në një liqen të ngrirë në Teksas, humbin jetën tragjikisht tre të mitur

Tre vëllezër. të mitur, kanë humbur jetën në Bonham, në veri të Teksasit, pasi ranë në një liqen të ngrirë të hënën e kaluar.

Nëna e djemve, Cheyenne Hangaman, tha se kishte tentuar t’i shpëtonte duke i nxjerrë nga uji dhe duke i vendosur mbi akull, por ai vazhdonte të thyhej.

“Ata ishin tre dhe vetëm unë isha... kjo është arsyeja pse nuk mund t’i shpëtoja,” tha ajo për CBS News.

Ajo e përshkroi secilin prej djemve të saj, të moshës 6, 8 dhe 9 vjeç, si fëmijë të dashur dhe me shumë personalitet, duke bërë thirrje për të gjithë prindërit që të "mbajnë fëmijët e tyre afër dhe t'u thonë gjithmonë se i duan". 

Hangaman, nënë e gjashtë fëmijëve, mori vesh për tragjedinë kur vajza e saj vrapoi drejt saj dhe i tha që djemtë kishin rënë në liqen. Fëmijët ishin duke luajtur pranë liqenit, rreth 30 metra larg shtëpisë ku po qëndronte familja. I vogli ra i pari, pasi po përpiqej të luante mbi akullin që mbulonte ujin. Dy djemtë më të mëdhenj ranë pas tij.

"Kur i pashë, ata po luftonin dhe e dija që trupat e tyre kishin hyrë në shok nga ftohtësia. Uji ishte shumë i ftohtë," tha ajo.

Hangaman u përpoq t’i shpëtonte, por nisi të kishte vështirësi dhe u shpëtua nga një fqinj.

“U mundova të luftoja për jetën e fëmijëve të mi, por duke i parë që po luftonin dhe po mbytej dhe unë nuk mund t’i ndihmoja," tha ajo.

Fqinji, një trajner futbolli në shkollën e djemve, dëgjoi thirrjet e saj për ndihmë dhe vrapoi për ta shpëtuar. Ai e tërhoqi atë nga uji me një litar kuajsh.

Në një deklaratë, zyra e sherifit lokal tha se dy djemtë më të mëdhenj u nxorën nga uji nga punonjësit e urgjencës dhe një fqinj dhe u dërguan në spitalin lokal. Gjashtëvjeçari u gjet më vonë pas një kërkimi të gjerë në liqen. Autoritetet nuk e shpallën identitetin e fëmijëve, por familjarët i identifikuan si Howard Doss, 6 vjeç, Kaleb Doss, 8 vjeç dhe EJ Doss, 9 vjeç.

Përshkrimi i djemve nga nëna e tyre: EJ ëndërronte të bëhej një yll i futbollit, Kalebi e donte kërcimin dhe këndimin, ndërsa më i vogli, Howard, i pëlqente të bënte të tjerët të qeshnin.Shkolla e djemve tha se ata ishin "të shkatërruar nga ky humbje e paimagjinueshme" dhe që do të ofronin mbështetje psikologjike për nxënësit dhe stafin.

Vdekja e tyre ndodhi në një periudhë kur një stuhi dimri e fuqishme ka goditur një pjesë të madhe të SHBA-së, përfshirë Teksasin, duke shkaktuar mbi 20 viktima dhe duke lënë mijëra njerëz pa energji elektrike.