Mijëra njerëz marshojnë në Paris për vdekjen e punëtorit emigrant gjatë paraburgimit nga policia

Një protestë u mbajt gjatë fundjavës në Paris, për shkak të vdekjes së një punëtori emigrant mauritanian gjatë paraburgimit nga policia.

Arrestimi i dhunshëm më 14 janar i 35-vjeçarit, El Hacen Diarra u kap në kamera dhe u shpërnda në mediat sociale.

Rreth 1,000 njerëz u mblodhën në kryeqytetin francez, duke iu përgjigjur thirrjeve nga grupe të ndryshme që kundërshtonin brutalitetin e policisë.

Demonstruesit kërkuan drejtësi për Diarrën, i cili vdiq pasi u ndalua dhunshëm.

Në protestën, e mbajtur në heshtje nën mbikëqyrjen e policisë, morën pjesë edhe familja e Diarrës.

Demonstruesit mbanin pankarta ku shkruhej "Drejtësi për El Hacen Diarra" dhe "Pa drejtësi, pa paqe".

Diarra u mor në paraburgim në arondismanin e 20-të të Parisit për dyshimin se i rezistoi arrestimit dhe dyshohet se posedonte "një substancë kafe që i ngjan kanabisit" dhe "dokumente administrative të falsifikuara".

Familja e tij pretendoi se ai iu nënshtrua dhunës policore përpara konviktit të punëtorëve migrantë ku jetonte.

Pamjet e kapura nga banorët vendas treguan dy oficerë që grushtonin një person të shtrirë në tokë.

Gjatë një shqyrtimi të pamjeve filmike të kërkuara nga familja, Diarra u dëgjua duke thënë "Po më mbytni".

Prokurorët e Parisit vunë në dukje se kamerat e trupit të oficerëve nuk ishin funksionale në atë kohë për shkak të baterive të shteruara.

Një hetim ka nisur nën akuzën e "shkaktimit të vdekjes me dhunë të qëllimshme nga një person që përfaqëson autoritetin publik".

Ministri i Brendshëm francez Laurent Nunez kundërshtoi pezullimin e përkohshëm të oficerëve, ndërsa familja e Diarra-s kërkoi ndalimin e tyre./ AA.