‘Më shumë takime se Rama në Izrael’/ Presidentja e Republikës Srpska dhe Milorad Dodik publikojnë agjendën

JERUSALEM, 25 JANAR, SRNA – Presidentja në detyrë e Republikës Srpska, Ana Trišić-Babić, dhe kryetari i partisë SNSD, Milorad Dodik, ndodhen në një vizitë zyrtare disaditore në Izrael, ku do të zhvillojnë një sërë takimesh të rëndësishme me zyrtarë izraelitë.

Një takim me Presidentin e Izraelit, Isaac Herzog, është planifikuar për nesër, si dhe pjesëmarrja në një ligjëratë kushtuar filozofit dhe shkrimtarit hebre Ze’ev Jabotinsky.

Presidenti Herzog do të mbajë një fjalim, i cili do të pasohet nga një ligjëratë e Ambasadorit të SHBA-së në Izrael, Michael Dale Huckabee, me titull “Një Aleancë e Pathyeshme: Një Trashëgimi Guximi, një e Ardhme Shprese – Mesazhi i Qëndrueshëm i Jabotinskyt në Shekullin XXI.”

Delegacioni i Republikës Srpska do të marrë pjesë gjithashtu nesër në Konferencën Ndërkombëtare për Luftën kundër Antisemitizmit, e cila do të hapet në mënyrë ceremoniale në orën 19:30.

Fjalën hapëse do ta mbajë Kryeministri i Izraelit, Benjamin Netanyahu, e ndjekur nga një fjalim i Ministrit për Çështjet e Diasporës dhe Luftën kundër Antisemitizmit, Amichai Chikli.

Ditën e dytë të vizitës, të martën, është planifikuar një takim në Ambasadën e SHBA-së në Izrael, i ndjekur nga një takim me Shenjtërinë e Tij Theophilos III, Patriarkun e Jerusalemit.

Pasdite do të zhvillohet një takim me Benjamin Zumer, Drejtor i Përgjithshëm për Çështje Korporative dhe Ndërmarrje të Përbashkëta në Chevron Mediterranean Limited.

Të mërkurën, më 28 janar, është planifikuar një takim me deputetin e Knessetit, Ze’ev Elkin, nga partia Neë Hope, i ndjekur nga një takim me Kryeministrin e Shtetit të Izraelit, Benjamin Netanyahu.

Në kuadër të vazhdimit të vizitës, janë planifikuar gjithashtu takime me Ministrin për Çështjet e Diasporës dhe Luftën kundër Antisemitizmit, Amichai Chikli, si dhe me Ministrin e Energjisë dhe Infrastrukturës, Eli Cohen.

Të enjten, më 29 janar, në një ceremoni zyrtare, Kryetari i Knessetit, Amir Ohana, do t’i dorëzojë Kryetarit të SNSD-së, Milorad Dodik, një çmim shumë të rëndësishëm – medaljen për nxitjen e marrëdhënieve të mira me Izraelin, “Çmimin Jabotinsky për Liri.”

Pas ceremonisë, delegacioni i Republikës Srpska do të takohet me Ministrin e Punëve të Jashtme të Izraelit, Gideon Sa’ar.

Delegacioni i Republikës Srpska përfshin gjithashtu deputetin serb në Dhomën e Popujve të Asamblesë Parlamentare të Bosnje dhe Hercegovinës, Radovan Kovačević./ srpskanational.com – Syri.net/