Edin Džeko vendos rekord historik në Bundesliga 2 në debutimin me Schalke 04

Edin Džeko vazhdon të sfidojë kohën dhe moshën, duke hyrë edhe një herë në historinë e futbollit europian. Sulmuesi boshnjak i Schalke 04 ka vendosur një rekord të ri në Bundesliga 2, pasi realizoi gol që në ndeshjen e tij të parë me fanellën e klubit gjerman, në barazimin 2-2 ndaj Kaiserslautern.

Në momentin e zhvillimit të sfidës, Džeko ishte 39 vjeç, 10 muaj dhe 8 ditë, duke u bërë kështu golashënuesi më vjetër në historinë e kategorisë së dytë gjermane. Një arritje e jashtëzakonshme që konfirmon profesionalizmin, përgatitjen fizike dhe instinktin e pandryshuar të golit që e ka shoqëruar gjatë gjithë karrierës së tij.

Rekordi i mëparshëm mbahej nga Helmut Haller, i cili kishte shënuar për Augsburg-un, në shkurt të vitit 1979, në një moshë pak më të re se ajo e Džekos, me diferencë afro tre muaj. Pas më shumë se katër dekadash, ky rekord tashmë i përket sulmuesit boshnjak.

Kalimi i Džekos te Schalke 04 është pritur me interes të madh nga tifozët, të cilët shohin tek ai jo vetëm një lider në fushë, por edhe një figurë me eksperiencë të jashtëzakonshme ndërkombëtare. Goli në debutim është një sinjal i qartë se ish-‘ylli’ i Romës, Interit dhe Manchester City-t mbetet ende një pikë referimi në repartin ofensiv.

Edin Džeko dëshmon se klasi nuk njeh moshë, ndërsa Bundesliga 2 tashmë ka një rekord të ri, të shkruar nga një emër i madh i futbollit europian.