Conte: Po lundrojmë në det të hapur me valë shumë të larta, por nuk zbresim nga anija

Trajneri i Napolit, Antonio Conte, komentoi humbjen e rëndë 3-0 ndaj Juventusit në ‘Allianz Stadium’, që e çoi ekipin e tij në -9 nga Interi kryesues:

“Derisa ndeshja ishte 0-0, gjithçka ishte e ekuilibruar dhe dukej se mund të ndodhte diçka për të barazuar. Pastaj, pas golit të dytë, hapësirat u hapën dhe ata shënuan të tretin. Urime atyre, por edhe lojtarëve të mi, që dhanë gjithçka edhe sonte. Ka raste që arrin të kesh sukses përtej pengesës dhe raste të tjera që nuk mundesh. Për herë të parë në karrierë kam futur në lojë një lojtar që nuk e kisha parë kurrë, Giovane-n, i cili mbërriti dje në grumbullim; kjo është fotografia e momentit që po kalojmë. E dimë që po lundrojmë në det të hapur me valë shumë të larta, por nuk zbresim nga anija. Po luftojmë me gjithë fuqinë tonë ndaj një situate të pabesueshme.”

Conte komentoi edhe për protestat e lojtarëve të Napolit për një kontakt Hojlund-Bremer:

“Jo, nuk e pashë. Të kërkoja që Mariani të shkonte te VAR-i? Kundër Veronës shkoi dy herë dhe ndryshoi vendimin dy herë; nuk ishte personi më i përshtatshëm për këtë. Le të bëjnë çfarë mendojnë ata, ne shpresojmë gjithmonë që të ketë gjithmonë ndershmëri mes atyre që shikojnë, thonë dhe gjykojnë. Nëse ka një gabim, të jetë gabim njerëzor. Ndoshta më mirë ishte më parë, sepse e duroje më lehtë. Tani me një video është më e vështirë.”

Pyetjes nëse Napoli është ende në garë për titullin, Conte u përgjigj:

“Në këtë moment është një pyetje e çmendur, kanë mbetur edhe 16 ndeshje. Nuk zbresim nga anija sepse kemi shumë objektiva: Champions, Europa League; nëse zbresim nga anija, rrezikojmë të dalim nga Europa. Ne përpiqemi të bëjmë më të mirën, lojtarët japin gjithçka dhe rrezikojnë edhe fizikisht: gjithmonë luajnë të njëjtët dhe është e pashmangshme që dikush të lëndohet. Edhe Neres është operuar… ky sezon është diçka e pabesueshme, po vuajmë. Do të thotë që duhet të paguajmë diçka që kemi bërë më parë dhe nuk duhet të bëjmë; më mirë të buzëqeshim.”