'Sinners' thyen rekordin e 'Titanic'/ Gjithçka që duhet të dini për ceremoninë Oscars 2026

Edicioni i 98-të i çmimeve Oscar tashmë ka të konfirmuara datën, vendin dhe prezantuesin, duke ndezur zyrtarisht pritjen për ngjarjen më të rëndësishme të kinemasë botërore.

Ceremonia do të mbahet të dielën, më 15 mars 2026, në Dolby Theatre në Los Angeles, lokacioni tradicional që prej vitesh shërben si skena ku kurorëzohen arritjet më të spikatura të industrisë së filmit. Zgjedhja e këtij vendi riafirmon rolin e Hollywood-it si epiqendra globale e kinemasë.

Transmetim në ABC dhe Hulu

Transmetimi zyrtar i Oscars 2026 do të realizohet nga ABC, ndërsa ceremonia do të jetë e disponueshme edhe për ndjekje live në Hulu për abonentët në Shtetet e Bashkuara. Ky kombinim synon të zgjerojë audiencën digjitale, pa hequr dorë nga televizioni tradicional.

Conan O’Brien rikthehet si prezantues

Mbrëmja gala do të drejtohet sërish nga Conan O’Brien, i cili rikthehet për vitin e dytë radhazi si prezantues. Vendimi vjen pas pritjes pozitive që pati performanca e tij në edicionin e kaluar, ku u vlerësua për humorin, ritmin dhe përvojën televizive.

Nominimet dhe rregullat e reja

Nominimet do të shpallen më 22 janar. Filmi “Sinners” ka bërë histori duke siguruar 16 nominime, një rekord për këtë ceremoni.
Nga ky edicion e tutje, Akademia do të zbatojë një rregull të ri: anëtarët duhet t’i kenë parë të gjithë filmat e nominuar në një kategori përpara se të votojnë në raundin final, një masë që synon rritjen e transparencës dhe seriozitetit të procesit.

24 kategori dhe një risi historike

Në Oscars 2026 do të ndahen 24 kategori konkurruese, përfshirë edhe risinë Best Casting (Kasti më i mirë), e cila vlerëson punën kyçe pas përzgjedhjes së aktorëve.

Që nga edicioni i parë më 16 maj 1929, Oscars janë shndërruar në ceremoninë më të vjetër të çmimeve në botën e argëtimit. Rekordin për më shumë statuja e mban Walt Disney, me 22 çmime konkurruese dhe katër nderi, një arritje që mbetet ende e pathyer.