Moti ekstrem në Greqi, dy të vdekur nga përmbytje masive

 i keq që goditi pjesën më të madhe të Greqisë ka shkaktuar pasoja tragjike, me dy persona që humbën jetën, përmbytje të gjera, ndërprerje të transportit dhe qindra ndërhyrje të shërbimeve emergjente. Atika ishte rajoni më i prekur nga fenomenet ekstreme.

Një grua 56-vjeçare humbi jetën mbrëmjen e së mërkurës në Ano Glyfada, pasi u rrëmbye nga ujërat e rrëmbyeshme teksa po ecte në rrugën Kyrillou Methodio.
Sipas Policisë Helenike, ngjarja ndodhi pak para orës 21:00. Gruaja u bllokua nën një automjet dhe u nxor pa ndjenja nga forcat zjarrfikëse.

Ajo u transportua menjëherë nga shërbimi emergjent EKAB, por mjekët konstatuan vdekjen e saj.

Një tjetër ngjarje e rëndë u regjistrua në Astros të Kynourias, ku një oficer 53-vjeçar i Rojës Bregdetare, me gradën nëntoger, humbi jetën gjatë kryerjes së detyrës.

Sipas autoriteteve, oficeri ndodhej në patrullim këmbësor në port së bashku me komandantin e departamentit, kur një valë e fuqishme e goditi në kokë, duke i shkaktuar plagë fatale.  Ai u transportua pa ndjenja në Qendrën Shëndetësore të zonës, ku u shpall i vdekur.

Fenomeni ekstrem i motit shkaktoi përmbytje të përhapura, probleme serioze në qarkullim dhe ndërprerje të transportit publik, ndërsa zjarrfikësit kryen qindra operacione shpëtimi në zona të ndryshme të vendit.

Sipas meteorologut Kostas Lagouvardos, tetë reshjet më të larta të regjistruara në të gjithë Greqinë u shënuan në Atikë.

Në krye të listës renditet Papagou me 174 mm reshje, e ndjekur nga Nomismatokopio, Chalandri, Vyronas, Drosia, Ilioupoli, Maroussi dhe Ampelokipoi.

Të dhënat bazohen në matjet e 543 stacioneve meteorologjike të rrjetit meteo.gr / Observatori Kombëtar i Athinës, të cilat tregojnë përmasat e jashtëzakonshme të reshjeve gjatë 24 orëve të fundit.