Bota me sytë në Davos/ Fillojnë orët vendimtare për fatin e Groenlandës
Nga Herbert Bauernebel, BILD
Fillon numërimi mbrapsht për paraqitjen e Trump në Davos!
Presidenti amerikan, Donald Trump, është rrugës për në Zvicër me vonesë. Avioni qeveritar i tij pati një defekt teknik dhe ai u detyrua të ndërrojë avionin – ende nuk është e qartë se kur do të mbërrijë në Samitin Botëror Ekonomik.
Një gjë është e sigurt: Trump këmbëngul që Groenlanda t’i bashkohet SHBA-së – po fillojnë orët vendimtare.
Para nisjes, pati një kurs zigzag sa i përket ishullit arktik: “Ne duhet ta kemi Groenlandën”, e përsëriti fillimisht. Dhe shtoi me tone të ashpra se, NATO pa të, do të ishte vetëm një “grumbull hiri”. Sërish, Trump u ankua se e meriton Çmimin Nobel për Paqe. Por ai preku edhe tema më pajtuese: për Groenlandën janë planifikuar “shumë takime” dhe një “zgjidhje” mund të jetë në horizont. Ai la të kuptohej se edhe NATO mund të përfshihet. Kjo tingëlloi si kompromis, si një marrëveshje e mundshme. Por, kur u pyet se sa larg do të shkonte, ai shtoi: “Prisni dhe shikoni!” Të paktën, sipas “New York Times”, Pentagoni ende nuk ka përgatitur plane sulmi.
Në Davos, fjalimi i Trump (me gjasë pasdite) pritet me shumë interes. Gjatë fluturimit të natës prej 6600 kilometrash drejt Cyrihut, ekipi i tij donte t’i bënte retushimet e fundit fjalimit për Davos – edhe pse Trump njihet për faktin se shpesh devijon nga teksti i përgatitur.
Në bordin e avionit presidencial ndodhet edhe një pjesë e delegacionit më të madh amerikan ndonjëherë, me gjithsej 300 delegatë. Pritet që me Trump të udhëtojnë këshilltarët e tij më të afërt nga Zyra Ovale, përfshirë shefen e kabinetit, Susie Wiles, zëdhënësen Karoline Leavitt dhe figurën e ashpër për Groenlandën, Stephen Miller (40). Ministri i Tregtisë, Scott Bessent ka udhëtuar më herët.
Në Davosin shumë të tensionuar, pritet një “ditë dramatike e Trump”! Politologu amerikan, Scott Erb, u rekomandon evropianëve më shumë qëndrueshmëri: “Ata duhet ta kenë kuptuar se presidenti Trump rrallëherë zbutet”, thotë ai për BILD. Sipas tij, Trump këshillohet nga njerëz “që e përçmojnë hapur Evropën”.