VIDEO/ I vihet flaka statujës së Cristiano Ronaldos, autori filmon aktin vandal

Një akt i rëndë vandalizmi ka tronditur ishullin e Madeirës, vendlindjen e Cristiano Ronaldos, ku një statujë e legjendës portugeze të futbollit është dëmtuar rëndë pasi i është vënë flaka.

Autoritetet portugeze kanë nisur menjëherë hetimet dhe janë në kërkim të autorit, i cili jo vetëm që kreu aktin, por e publikoi atë edhe në rrjetet sociale.

Instagram user 'zaino.tcc.filipe' filmed himself setting fire to Cristiano Ronaldo's statue outside the CR7 Museum in Funchal.

Madeira's PSP (Public Security Police) says it is "trying to identify the perpetrator of the crime of damage." pic.twitter.com/qUt70chEqq

— NassrXtra (@NassrXtra1) January 21, 2026

Sipas informacioneve paraprake, një i ri ka filmuar veten teksa i hedh një lëng të ndezshëm statujës prej bronzi të Cristiano Ronaldos, përpara se ta ndizte me çakmak.

Pamjet, që u shpërndanë me shpejtësi në internet, kanë shkaktuar reagime të ashpra nga tifozët dhe nga komuniteti lokal, duke u cilësuar si një akt i papranueshëm mungese respekti ndaj figurës më të njohur të ishullit.

Statuja, e vendosur në një zonë të frekuentuar nga turistët, është një nga simbolet më të vizituara të Madeirës dhe një homazh për karrierën e jashtëzakonshme të ish-yllit të Manchester United, Real Madridit dhe kombëtares së Portugalisë. Fatmirësisht, sipas burimeve policore, dëmet janë kryesisht sipërfaqësore, por kërkohet restaurim i menjëhershëm.

Policia po analizon pamjet e publikuara në rrjetet sociale dhe kamerat e sigurisë për të identifikuar autorin, i cili rrezikon ndjekje penale për shkatërrim prone publike dhe nxitje urrejtjeje.

Ngjarja ka ngjallur indinjatë të madhe në opinionin sportiv dhe publik, ndërsa tifozët e Cristiano Ronaldos kanë kërkuar ndëshkim shembullor për autorin dhe mbrojtje më të madhe të monumenteve simbolike në Madeira.