'Më të mirët në botë'/ Pse SHBA-të po blejnë anije akullthyese nga Finlanda

Ndërsa prresidenti Donald Trump vazhdon të këmbëngulë se SHBA-të duhet të zotërojnë Groenlandën, fokusi i tij më i gjerë mbi rajonin Arktik ka bërë që Uashingtoni të porosisë anije të reja akullthyese.

Për këto anije, të cilat mund të lundrojnë në dete të mbuluara me akull të fortë, SHBA-të i janë drejtuar ekspertit botëror: Finlandës.

Temperaturat janë nën zero brenda laboratorit të akullit të Aker Arctic Technology, ndërsa modeli në shkallë i një akullthyese lundron në një rezervuar simulimi 70 metra të gjatë. Ai hap një kanal të pastër përmes sipërfaqes së ngrirë të ujit.

Duke iu nënshtruar testimeve në një qendër në Helsinki, kryeqyteti i Finlandës, ky është një dizajn për gjeneratën e ardhshme të akullthyeseve të vendit.

“Është thelbësore që të ketë forcë strukturore të mjaftueshme dhe fuqi motorike,” thotë inxhinierja e performancës së akullit, Riikka Matala, citon BBC.

Mika Hovilainen, drejtori ekzekutiv i firmës, shton se forma e anijes është gjithashtu vendimtare. “Duhet të kesh një formë trupi që thyen akullin duke e shtyrë poshtë,” thotë ai. “Nuk është prerje, nuk është copëtim.”

Finlanda është lideri i padiskutueshëm botëror kur bëhet fjalë për anije që thyejnë akullin. Kompanitë finlandeze kanë projektuar 80% të të gjitha atyre që janë aktualisht në funksion, dhe 60% janë ndërtuar në kantieret detare të Finlandës.

Vendi udhëheq nga nevoja, shpjegon Maunu Visuri, president dhe drejtor ekzekutiv i kompanisë shtetërore finlandeze Arctia, e cila operon një flotë prej tetë akullthyesesh.

“Finlanda është i vetmi vend në botë ku të gjitha portet mund të ngrijnë gjatë dimrit,” thotë ai, duke shtuar se 97% e të gjitha mallrave në vend importohen me det.