Flamurtari mposht thellë Bylisin dhe ngjitet në vendin e tetë

Flamurtari ka arritur një fitore të pastër dhe të thellë 3-0 ndaj Bylisit, duke mposhtur një rival direkt dhe duke u ngjitur në vendin e tetë në renditje. Një performancë solide dhe efektive e skuadrës së trajnerit italian Moriero e vendosi ndeshjen që në pjesën e parë.

Goli i parë erdhi në minutën e 29-të. Trashi harkoi nga e djathta dhe Koxhi nuk e largoi si duhet topin, duke i dhënë mundësinë Urbaez-it të shënonte me goditjen e dytë, duke çuar Flamurtarin në avantazh 1-0.

Pjesa e dytë filloi me të njëjtin ritëm kërkues nga vendasit. Në minutën e 49-të, Herald Marku realizoi një supergol direkt nga goditja e dënimit, duke dyfishuar avantazhin e Flamurtarit dhe duke vendosur një kontroll të qartë të lojës.

Goli i tretë erdhi në minutën e 64-t, kur Trashi harkoi nga këndorja dhe Maksuti finalizoi me sukses, duke vulosur fitoren 3-0 për ekipin e tij. Bylisi pati disa raste për të reduktuar diferencën, përfshirë një moment ku Sanogo kaloi portierin Aleksovski në minutën e 75-t, por nuk arriti të finalizonte.

Kjo fitore bën që Flamurtari të parakalojë në renditje pikërisht Bylisin, duke marrë një bonus të fortë moral për pjesën e mbetur të kampionatit, me synim kryesor shmangien jo vetëm të rënies së drejtpërdrejtë, por edhe të play off-it për qëndrimin në Superiore.