Nënshkruhet marrëveshja BE-Mercosur, 25 vite negociata! Costa: Tregti e lirë, jo armë gjeopolitike

Bashkimi Evropian dhe vendet e Mercosur kanë nënshkruar një marrëveshje tregtare, që prek rreth 700 milionë konsumatorë.

Marrëveshja, fryt i 26 viteve negociatash, u nënshkrua së fundmi në prani të Presidentes së Komisionit Evropian, Ursula von der Leyen, dhe presidentit aktual të aleancës Mercosur, udhëheqësit paraguaian Santiago Peña, në një vend shumë simbolik: amfiteatrin e Bankës Qendrore të Paraguait, ku "Traktati i Asuncionit" që krijoi Mercosur u nënshkrua në vitin 1991 nga krerët e shteteve të Argjentinës, Brazilit, Paraguait dhe Uruguait. 

"Rëndësia gjeopolitike e kësaj marrëveshjeje nuk mund të nënvlerësohet. Ne po krijojmë një platformë për të punuar në një sërë çështjesh globale, nga mbrojtja e mjedisit tonë të çmuar natyror deri te reformimi i institucioneve globale. Ne do të bashkojmë forcat si kurrë më parë, sepse besojmë se kjo është mënyra më e mirë për të siguruar prosperitetin e popujve dhe vendeve tona. Dhe kur dy rajonet tona flasin me një zë për çështjet globale, bota do të dëgjojë", tha Presidentja e Komisionit Evropian Ursula von der Leyen gjatë ceremonisë së nënshkrimit të marrëveshjes BE-Mercosur.  

"Kjo marrëveshje do të eliminojë taksat doganore dhe barrierat e tjera tregtare dhe do të hapë prokurimin publik. Do të ofrojë një kuadër të qartë rregullator për të inkurajuar investimet dhe flukset tregtare. Kjo do t'u sjellë shumë dobi kompanive në të dyja anët, duke përfshirë 30,000 ndërmarrjet e vogla dhe të mesme evropiane që tashmë eksportojnë në këtë rajon të gjerë. Rritja e eksporteve do të krijojë vende pune, si këtu ashtu edhe në Evropë", shtoi ajo.

"Do të doja gjithashtu të theksoja se si kjo marrëveshje do të mbështesë ambiciet tona për të mbrojtur natyrën dhe klimën. Ekziston një kapitull i rëndësishëm mbi tregtinë dhe zhvillimin e qëndrueshëm. Ne jemi të përkushtuar të ndihmojmë njëri-tjetrin në kalimin drejt neutralitetit klimatik. Evropa do të fitojë akses më të mirë në lëndët e para që na nevojiten për tranzicionin tonë, dhe investimet evropiane do të mbështesin vendet e Mercosur në tranzicionin e tyre. Kështu duhet të jetë tregtia. Partnerët me forca plotësuese mbështesin njëri-tjetrin. Qytetarët tanë mund të jenë të sigurt se ne i kemi në zemër interesat e fëmijëve dhe nipërve e mbesave të tyre."

"Rëndësia e kësaj marrëveshjeje shkon përtej shifrave. Ne po dërgojmë një mesazh rreth thelbit të tregtisë së lirë, multilateralizmit dhe ligjit ndërkombëtar si themel i marrëdhënieve midis rajoneve, në vend të një arme gjeopolitike", tha Presidenti i Këshillit Evropian, Antonio Costa, gjatë ceremonisë që shënoi marrëveshjen BE-Mercosur.

"Mund të vijë vonë, por vjen në kohën e duhur: ne nuk duam të krijojmë sfera ndikimi, por zona të prosperitetit të përbashkët. Ne nuk duam të dominojmë ose imponojmë, por përkundrazi të forcojmë lidhjet midis qytetarëve dhe bizneseve tona", shtoi ai. "Ndërsa ka nga ata që ndërtojnë barriera, ne ndërtojmë ura."

"Rruga më e vështirë është ajo e marrëveshjes. Ne nuk po nënshkruajmë vetëm një marrëveshje tregtare, por po pohojmë se të gjithë vazhdojmë të duam të ndërtojmë një rend global të bazuar në rregulla dhe parashikueshmëri. Po marrim përgjegjësinë për të riafirmuar se sundimi i ligjit, demokracia dhe rregullat tregtare duhet të udhëheqin jetën e njerëzve", u shpreh Presidenti uruguaian, Yamandú Orsi,  në ceremoninë e nënshkrimit të marrëveshjes midis BE-së dhe Mercosur në Asunción./ ANSA.