Luis Enrique reagon ndaj rregullit të ri të mundshëm në futboll, kartonët “portokalli” ndajnë opinionet

Debati për rregullat e reja të mundshme në futboll po bëhet gjithnjë e më i nxehtë. Kohët e fundit kanë qarkulluar ide për futjen e kartonëve blu dhe portokalli, risi që kanë ndarë tifozët në dy kampe: ata që mendojnë se do të dëmtonin thelbin e lojës dhe të tjerë që besojnë se do ta bënin futbollin më dinamik dhe më tërheqës.

Së fundmi, mendimin e tij e ka dhënë edhe Luis Enrique, trajneri i Paris Saint-Germain. Gjatë një konference për shtyp, ai u pyet konkretisht për kartonin portokalli, i cili parashikon largimin e përkohshëm të një lojtari nga fusha për 20 minuta, në rast se ai kryen qëllimisht një faull të rëndë.

“Ne duhet të vazhdojmë të kërkojmë risi të tilla. Është e rëndësishme që futbolli të evoluojë vazhdimisht si sport. Nëse ekzistojnë mundësi për ta bërë lojën më sulmuese dhe më tërheqëse për tifozët, atëherë duhet t’i shfrytëzojmë. Unë jam gjithmonë i hapur ndaj ideve të reja”, u shpreh trajneri spanjoll.

Deklarata e Luis Enrique tregon qartë se ai nuk i mbyll dyert ndaj ndryshimeve, edhe pse shumica e tifozëve shprehen skeptikë për një rregull të tillë, duke pasur frikë se mund të prishë ritmin natyror të ndeshjeve.

Debati mbetet i hapur: a do ta pasuronte futbollin një karton portokalli, apo do ta largonte edhe më shumë nga tradita e tij? Koha dhe vendimet e institucioneve drejtuese do të tregojnë.