Me Edi Ramën, ta heq vizën dhe Amerika

Shqipëria ka hyrë në një listë të zezë që askush nuk do të donte ta shihte: vendet për të cilat Shtetet e Bashkuara kanë ngrirë përpunimin e vizave. Një vendim i qartë, që nuk ka të bëjë me burokraci të zakonshme, por me besueshmërinë dhe sigurinë e një vendi në raport me partnerët ndërkombëtarë.

E gjithë kjo nuk ndodh pa arsye. Në krye të një vendi që sot shikohet si narko-shtet, që ka lidhje të dyshimta me kartelet e drogës, dhe ku skandalet e korrupsionit janë të shumta, qëndrimi i SHBA është paralajmërues. Siguria e të dhënave personale të qytetarëve është zero, institucionet e shtetit funksionojnë në dëm të ligjit, dhe qytetarët paguajnë çmimin real të paaftësisë dhe kriminalizimit të politikës.

Edi Rama, në vetëm një dekadë, e ka kthyer Shqipërinë nga një vend që u anëtarësua në NATO dhe hoqi vizat me Europën, në një vend që SHBA e konsideron jo-partner strategjik, në radhë me vendet armiqësore dhe shtetet me institucione të dështuara si Rusia dhe Irani. Ky nuk është vetëm një paralajmërim politik – është turp diplomatik dhe tradhti kombëtare.

Ndërsa propaganda e qeverisë vazhdon të mbulojë realitetin me retorikë boshe, qytetarët e zakonshëm vuajnë pasojat: humbje mundësish, izolim ndërkombëtar dhe një të ardhme të pasigurt. Mesazhi i SHBA është i qartë: qeverisja e Ramës ka pasoja konkrete, dhe çdo ditë pa reforma thellon krizën e vendit.