Bashkia Shkodër/ 590 ha tokë ende nën ujë, në Obot shkohet me makina ushtrie

Në Bashkinë Shkodër, situata hidrologjike vazhdon të paraqesë disa problematika, megjithëse janë vërejtur përmirësime të ndjeshme gjatë natës dhe orëve të para të mëngjesit.

Pavarësisht rënies së niveleve të ujit, zona të mëdha të tokës bujqësore vazhdojnë të jenë të përmbytura.

Sot, janë 590 ha tokë me prezencë uji, ndërkohë që të prekurat kryesore mbeten Ana e Malit (420 ha) dhe Velipoja (90 ha), që vazhdojnë të përballen me dëme të mëdha.

Një nga problemet kryesore është vazhdimi i vështirësive për qarkullim në rrugën drejt fshatit Obot.

Për të mundësuar lëvizjen, po përdoren mjete të ushtrisë, çka tregon se ende ka pengesa dhe vështirësi për banorët dhe shërbimet për të qarkulluar normalisht.

Edhe pse nivelet e ujit kanë pësuar rënie, disa zona si Dajçi dhe Oboti kanë parë ulje të ngadaltë të nivelit të ujit, duke treguar se normalizimi i plotë i situatës do të kërkojë ende kohë.