Trump merr në dorë hartën me 50 objektiva/ SHBA mund të godasë Iranin

Nga Elina Shirazi, DAILY MAIL

Administrata Trump është pajisur me një listë shumë të sofistikuar objektivash ushtarake me vlerë të lartë, ndërsa presidenti po shqyrton mundësinë e një sulmi ndaj Iranit.

United Against Nuclear Iran- Të Bashkuar Kundër Iranit Bërthamor (UANI), një organizatë jofitimprurëse me seli në Uashington, ka përpiluar një dosje me 50 objektiva dhe ua ka dorëzuar zyrtarëve të Shtëpisë së Bardhë në orët e para të mëngjesit të së hënës, përpara takimeve kritike të sigurisë, i tha ekskluzivisht Daily Mail-it kjo organizatë.

Dokumenti zbulon koordinatat e sakta të Shtabit Tharallah të Gardës Revolucionare Islamike (IRGC) — qendra nervore e shtypjes brutale ndaj protestuesve. Ky shtab funksionon praktikisht si qendra kryesore e komandës ushtarake, duke pasur kontroll operacional mbi forcat e policisë.

Lista e objektivave përfshin katër nën-shtabe kyçe që mbikëqyrin rajone të ndryshme të kryeqytetit: Nën-shtabi Quds, që mbulon operacionet shtypëse në veriun dhe veriperëndimin e Teheranit; Nën-shtabi Fath në jugperëndim; Nën-shtabi Nasr në verilindje; dhe Nën-shtabi Ghadr, i cili kontrollon juglindjen dhe Teheranin qendror.

Duke identifikuar këto vende dhe ndarje specifike, ushtria amerikane tashmë do të kishte një hartë të qartë të aftësive të IRGC-së për të koordinuar vrasjen e qytetarëve të vet — një mizori që e ka zemëruar presidentin amerikan dhe e ka shtyrë atë të hartojë opsione për të ndihmuar protestuesit.

“Cikli i protestave dhe shtypjes do të vazhdojë nëse nuk ndryshon ekuilibri i fuqisë midis protestuesve iranianë të paarmatosur dhe aparatit plotësisht të armatosur e të radikalizuar të represionit të regjimit,” deklaroi Kasra Aarabi, Drejtor i Kërkimit mbi IRGC-në në UANI, për Daily Mail.

Përtej qendrave kryesore të komandës, dosja zbulon një infrastrukturë të fshehtë në të gjithë Teheranin, e cila vepron si rrjeti kryesor komandues për njësitë më të radikalizuara të regjimit, duke koordinuar inteligjencën, policinë dhe operacionet psikologjike.

Objektivat përfshijnë 23 baza rajonale të IRGC-Basij — secila e vendosur në një nga 22 zonat komunale të Teheranit. Basij përbën milicinë e brendshme brutale të IRGC-së.

Shtëpia e Bardhë nuk iu përgjigj kërkesës së Daily Mail për koment lidhur me dosjen.

Lista e dorëzuar nga UANI përfshin gjithashtu njësitë operative që drejtojnë gjakderdhjen, përfshirë dy brigada kyçe: Brigada e Sigurisë Aaleh-e Mohammad, e vendosur në verilindje të Teheranit, dhe Brigada e Sigurisë Al-Zahra, e vendosur në juglindje të Teheranit.

Ndërsa numri i viktimave mes protestuesve iranianë raportohet se ka kaluar 2.000, sipas një organizate për të drejtat e njeriut — dhe mijëra të tjerë përballen me ekzekutim në sistemin famëkeq të burgjeve të regjimit — administrata Trump ka sinjalizuar se koha e durimit diplomatik ka përfunduar.

Trump tregoi të martën se kishte anuluar të gjitha takimet me zyrtarë iranianë, u tha protestuesve se “ndihma është rrugës” dhe i ftoi ata të “ruajnë emrat e vrasësve dhe abuzuesve”.

Ndërkohë, gjatë një dreke të republikanëve (GOP) në Capitol Hill, senatori Tom Cotton u angazhua në një retorikë të ashpër ndaj regjimit, sipas Punchbowl News.

Cotton i inkurajoi kolegët e tij të reagojnë me forcë si në mbështetje të protestuesve ashtu edhe të veprimeve të administratës, duke u thënë ligjvënësve se regjimi iranian aktualisht është “aq popullor sa sifilizi”.

Dr. Saeid Golkar, këshilltar i lartë në UANI, paralajmëroi se çdo rikthim te politikat e “dështuara” të së kaluarës do të sillte vetëm katastrofa të mëtejshme.

“Një marrëveshje me Teheranin vetëm sa e shtyn krizën dhe forcon institucionet që mbajnë gjallë represionin dhe agresionin rajonal,” tha Golkar. “Strategjia thelbësore e regjimit nuk është kompromisi, por qëndrueshmëria. Teherani po baston se mund t’i mbijetojë Trump-it në Uashington dhe Netanyahut në Izrael, për t’u rikthyer më pas te e njëjta recetë e ndërhyrjeve rajonale, zgjerimit të raketave dhe avancimit bërthamor.”

Ndërsa Shtëpia e Bardhë po shqyrton listën e objektivave të UANI-t, retorika e Trump-it ka arritur kulmin, duke paralajmëruar ajatollahët se po luajnë një “lojë shumë të rrezikshme”.

“Nuk kam dëgjuar për varje,” i tha Trump CBS-it të martën, teksa vizitonte një fabrikë Ford në Detroit. “Do të ndërmarrim veprime shumë të forta nëse ata bëjnë diçka të tillë.”

Gazetari i CBS, Tony Dokoupil, pyeti: “Dhe këto veprime të forta — për çfarë po flasim konkretisht? Cili është qëllimi final?”

Trump u përgjigj: “Nëse duan protesta, kjo është një gjë. Por kur fillojnë të vrasin mijëra njerëz — dhe tani po më flet për varje — do të shohim si do t’u shkojë. Nuk do t’u shkojë mirë.”