Morgje të mbushura me trupa dhe shtypje brutale e protestave/ Fundi tragjik i një 17-vjeçari në Iran: E qëlluan në zemër dhe e...

Në një depo të madhe në periferi të Teheranit, dyshemeja është e mbuluar me dhjetëra – ndoshta qindra – qese plastike të zeza që mbajnë trupa njerëzish. Burra dhe gra ecin mes rreshtave të kufomave, duke kërkuar një shenjë identifikuese për të gjetur të afërmit e tyre. Skena e rëndë raportohet nga Sky News dhe besohet se po përsëritet në mbarë Iranin.

Pamjet vijnë nga një qendër mjeko-ligjore shtetërore në Kahrizak, ku qeset me trupa shkarkohen nga kamionë dhe mjete të mëdha transporti. Ndërkohë, protestat mbarëkombëtare janë përballur me një shtypje të ashpër të orkestruar nga shteti. Organizatat e të drejtave të njeriut po përpiqen të dokumentojnë viktimat, me vlerësime që flasin për rreth 650 të vrarë.

Regjimi iranian ka ndërmarrë masa drastike për të ndërprerë rrjedhën e informacionit: interneti është bllokuar, telefonatat janë pothuajse të pamundura dhe, sipas raportimeve, janë çaktivizuar edhe marrësit e internetit satelitor Starlink. Burimi kryesor i informacionit mbetet televizioni shtetëror, i cili transmeton kryesisht tubime pro-qeveritare dhe mesazhe propagandistike.

Rasti i Amir Ali Haydari

Familjarë të një 17-vjeçari, Amir Ali Haydari, i kanë treguar Sky News se ai u qëllua dhe më pas u rrah për vdekje gjatë protestave në qytetin Kermanshah. Kushëriri i tij, Diako Haydari, që jeton në Cardiff, tha se adoleshenti kishte dalë në protesta me shokët e klasës.

“Sipas informacioneve nga familja, ai u qëllua në zemër dhe, ndërsa po jepte frymën e fundit, u godit vazhdimisht në kokë me qytën e pistoletës,” tha ai. Megjithatë, autoritetet lëshuan një certifikatë vdekjeje ku pretendohej se i riu kishte rënë nga një lartësi e madhe.

Pamje të filmuara në Kermanshah tregojnë policë civilë që frikësojnë protestuesit dhe qëllojnë me armë zjarri në rrugë. Familjarët thonë se shumë nga miqtë e Amirit u vranë ose u plagosën rëndë, ndërsa dy prej tyre ndodhen në koma.

Sipas dëshmive, numri i viktimave ishte aq i madh sa autoritetet përdorën autobusë urbanë për të transportuar trupat drejt morgut të Spitalit Taleghani. “Në spital kishte rreth 500 kufoma. Ai duhej ta identifikonte trupin e djalit mes të gjithëve,” tha Haydari.

Ndërsa regjimi përpiqet të projektojë një pamje normaliteti, raportimet nga terreni tregojnë përdorim të dhunës brutale kundër qytetarëve. Ngjarjet përforcojnë frikën se udhëheqja klerikale e Iranit është e gatshme të përdorë çdo mjet për të ruajtur pushtetin.