Serie A/ Juventusi me ‘5 yje’ ndaj Cremoneses
Juventusi dhuroi një paraqitje dominuese dhe mposhti bindshëm Cremonesen me rezultatin 5-0 në Serie A, duke konfirmuar formën e mirë dhe duke vazhduar bilancin perfekt ndaj “Le Tigri” këtë shekull.
“Zonja e Vjetër” e nisi ndeshjen me kontroll total dhe ishte pranë golit që në minutat e para, kur Jonathan David goditi shtyllën pas një gabimi në mbrojtjen mike.
Goli i avantazhit erdhi në minutën e 12-të, kur gjuajtja e Fabio Mirettit u devijua nga Gleison Bremer dhe përfundoi në rrjetë, duke mashtruar portierin Emil Audero.
Vetëm tre minuta më vonë, Khéphren Thuram bëri një depërtim të fuqishëm dhe asistoi për David, i cili realizoi me qetësi për 2-0.
Cremonese mendoi se do të rikthehej në lojë pas një penalltie të akorduar fillimisht për faullin e Manuel Locatellit ndaj Dennis Johnsen, por vendimi u anulua pas rishikimit, ndërsa trajneri Davide Nicola u përjashtua nga pankina.
Situata u përkeqësua edhe më shumë për miqtë kur Juventusi fitoi penallti pas një prekjeje me dorë nga Federico Baschirotto.
Gjuajtja e Kenan Yıldız u ndal nga Audero dhe shtylla, por talenti turk reagoi shpejt duke shënuar në rikthim për 3-0.
Në pjesën e dytë, Juventusi nuk uli ritmin. Weston McKennie detyroi mbrojtësin Matteo Bianchetti të devijonte topin në portën e vet për golin e katërt, ndërsa në minutën e 64-t, mesfushori amerikan vulosi rezultatin me një goditje me kokë, pavarësisht prekjes së lehtë nga portieri.
Cremonese u përpoq të shënonte golin e nderit, por Michele Di Gregorio u tregua vendimtar, ndërsa një gol i Matteo Bianchettit u anulua për prekje me dorë.
Edhe Jonathan David pa një gol të tijin të anulohej për pozicion jashtë loje.
Me këtë fitore, Juventusi regjistroi suksesin e gjashtë në shtatë ndeshjet e fundit në të gjitha kompeticionet dhe ngjitet në vendin e katërt në renditjen e Serie A, katër pikë larg Interit kryesues, edhe pse ka luajtur një ndeshje më shumë.
Në anën tjetër, Cremonese mbetet në vendin e 13-të pas humbjes së katërt në gjashtë ndeshjet e fundit.