Smithsonian zëvendëson portretin e Trump-it dhe heq referencën për gjyqet politike

Muzeu Smithsonian ka zëvendësuar një portret të Donald Trump-it dhe ka hequr tekstin në mur që i referohej dy fajësimeve të tij nga një ekspozitë për presidentët e SHBA-së.

Galeria Kombëtare e Portreteve në Uashington DC ka vendosur një fotografi bardhezi që tregon presidentin amerikan duke parë drejt kamerës, me grushtat mbi tavolinën Resolute.

Fotografia u vendos në ekspozitën Presidentët e Amerikës dhe është realizuar nga Daniel Torok, fotograf i Shtëpisë së Bardhë.

Ajo zëvendësoi një fotografi me ngjyra nga Matt McClain i Washington Post, ku Trump-i shfaqej me kravatë të kuqe përpara një sfondi të zi.

Edhe teksti shoqërues i imazhit është shkurtuar, duke e identifikuar Trump-in vetëm si presidentin e 45-të dhe të 47-të dhe duke dhënë datën e lindjes, ndërsa janë hequr detajet për fajësimet.

Administrata Trump ka kërkuar vazhdimisht të ndikojë te muze dhe institucione kulturore, duke u përpjekur t'i shtyjë ato të adoptojnë narrativa më të favorshme për presidentin.

Smithsonian ka qenë prej kohësh një objektiv i Trump-it, i cili në mars nxori një urdhër ekzekutiv të quajtur Rikthimi i së Vërtetës dhe Arsyes në Historinë Amerikane, që kërkonte nga zyrtarët të hetonin "ideologjinë e papërshtatshme" në muze dhe të paraqisnin një pamje më pozitive të së shkuarës së Amerikës.

Urdhri thoshte se Smithsonian kishte "rënë nën ndikimin e një ideologjie përçarëse të përqendruar te raca", që "promovonte narrativa që i paraqesin vlerat amerikane dhe perëndimore si në thelb të dëmshme dhe shtypëse".

Teksti pranë fotografisë së mëparshme të presidentit përfshinte informacione për skandalet e Trump-it, duke thënë pjesërisht: "I fajësuar dy herë, me akuza për abuzim me pushtetin dhe nxitje të kryengritjes pasi mbështetësit sulmuan Kapitolin e SHBA më 6 janar 2021, ai u shpall i pafajshëm nga Senati në të dy gjyqet." Aty përmendej gjithashtu se ai humbi zgjedhjet e vitit 2020 ndaj Joe Biden-it.

Muzeu zakonisht i ndërron rregullisht fotografitë e presidentit në detyrë derisa të zbulohet një pikturë zyrtare pasi ai largohet nga detyra.

Një zëdhënës i Galerisë Kombëtare të Portreteve i tha Washington Post se muzeu po shqyrton përdorimin e etiketave më të shkurtra, të ashtuquajtura "tombstone labels".

Institucione që i nënshtrohen vullnetit të Trump-it

Davis Ingle, zëdhënës i Shtëpisë së Bardhë, tha: "Për herë të parë në histori, Galeria Kombëtare e Portreteve e Smithsonian ka varur një foto ikonike të marrë nga Shtëpia e Bardhë për të nderuar presidentin Trump. Aureola e tij e pakrahasueshme do të shihet dhe do të ndihet në të gjithë sallat e Galerisë Kombëtare të Portreteve."

Në maj, presidenti njoftoi në platformën e tij Truth Social se kishte shkarkuar Kim Sajet, drejtoreshën e Galerisë Kombëtare të Portreteve, duke e quajtur atë një "person shumë partiak" dhe një "mbështetëse të fortë" të programeve të diversitetit dhe përfshirjes.

Smithsonian nuk e pranoi këtë dhe tha se Trump nuk kishte autoritet për ta bërë një gjë të tillë. Megjithatë, Sajet vendosi të japë dorëheqjen.

Në shkurt, presidenti e shpalli veten kryetar të Kennedy Center në Uashington, pavarësisht se nuk kishte autoritet dhe zëvendësoi anëtarët e bordit me aleatët e tij.

Më pas ai ndryshoi emrin e institucionit të arteve skenike në Trump-Kennedy Center. Të afërm të ish-presidentit John F. Kennedy e dënuan këtë veprim si "absurd, meskin dhe mendjengushtë".

Në një artikull që përkujtonte kryengritjen e 6 janarit, faqja zyrtare e Shtëpisë së Bardhë i përshkroi trazuesit si "protestues paqësorë" dhe fajësoi politikanë, përfshirë Nancy Pelosin, për "sajimin e një narrative të 'kryengritjes'". Trump ka falur gjithashtu personat e dënuar për krime pas sulmit.

Për të shmangur zemërimin e Trump-it, shumë institucione tashmë i janë nënshtruar vullnetit të tij.

Vitin e kaluar, Muzeu Kombëtar i Historisë Amerikane, një tjetër muze i Smithsonian në Uashington, ndryshoi formulimin e përshkrimit të fajësimit të Trump-it pas sulmit ndaj Kapitolit.

Ai hoqi referencat se akuza për nxitje bazohej në "deklarata të rreme të përsëritura" që sfidonin rezultatet e zgjedhjeve të vitit 2020 dhe në fjalimin e tij, i cili "inkurajoidhe në mënyrë të parashikueshme çoi në veprime të paligjshme në Kapitol". / The Telegraph – Syri.net