'Rusia dhe Kina mund ta pretendojnë', Trump: SHBA-të do ta kenë Groenlandën në një mënyrë ose në një tjetër!
Udhëheqësit evropianë kanë mbrojtur fuqishëm sovranitetin, integritetin territorial dhe të drejtën e Groenlandës dhe Danimarkës për të vendosur për çështjet që i përkasin atyre, por ende nuk ka një strategji të qartë se si të dekurajohet Trumpi - ose të reagohet nëse ai bën një hap.
Presidenti i SHBA-së, Donald Trump, ka përsëritur gjatë natës se SHBA-të do ta marrin Groenlandën “në një mënyrë ose në tjetrën”, ndërsa e përqeshi mbrojtjen e saj si “slitë me dy qen”, ndërsa theksoi se përndryshe Rusia dhe Kina do të lëviznin për të pretenduar territorin.
Duke folur me gazetarët në bordin e Air Force One, Trump tha se ishte i hapur për të arritur një marrëveshje për Groenlandën në parim, por këmbënguli se “në një mënyrë ose në një tjetër, ne do ta kemi Groenlandën”.
« Nëse nuk e marrim ne Groenlandën, do ta marrin Rusia ose Kina, dhe unë nuk do ta lejoj që kjo të ndodhë », tha ai, pavarësisht se nuk ka ndonjë interes të dukshëm nga asnjëra prej të dyja vendeve.
Trump gjithashtu talli mbrojtjen e Groenlandës, duke thënë se ajo përbëhet nga "dy saja me qen", të cilat përballen me "shkatërrues dhe nëndetëse ruse dhe kineze kudo".
I pyetur për ndikimin e mundshëm në NATO, Trump e injoroi atë, duke thënë:
"Nëse kjo ndikon në NATO, ndikon në NATO. Por e dini, ata kanë nevojë për ne, shumë më tepër sesa ne kemi nevojë për ta."
Ai gjithashtu pretendoi se e “shpëtoi” aleancën, duke nxitur rritjen e shpenzimeve të mbrojtjes dhe tha se po punonte për t’i dhënë fund pushtimit rus të Ukrainës.
Komentet e tij erdhën disa orë pasi kryeministrja daneze, Mette Frederiksen, paralajmëroi se Danimarka është në një “moment fatal” mes kërcënimeve të Trump për të marrë Grenlandën, duke akuzuar SHBA-në se potencialisht i ka kthyer shpinën NATO-s.
«Jemi në një udhëkryq dhe ky është një moment fatal», tha Frederiksen.
“Ajo që është në rrezik është më e madhe nga sa mund të shohë syri, sepse nëse ajo që përjetojmë nga amerikanët është se ata në fakt po i kthejnë shpinën aleancës perëndimore, se po i kthejnë shpinën bashkëpunimit tonë në NATO duke kërcënuar një aleat, gjë që nuk e kemi përjetuar më parë, atëherë gjithçka do të ndalet.”/ Guardian.