Maroku eliminon edhe Kamerunin, në gjysmëfinale përballë fituesit të çiftit Nigeri–Algjeri

Maroku, vendi organizator i Kupës së Afrikës, ka siguruar kualifikimin në gjysmëfinale pas një fitoreje të pastër 2-0 ndaj Kamerunit, pesë herë kampion i kontinentit. I mbështetur nga një atmosferë elektrizuese në stadiumin “Prince Moulay Abdellah” në Rabat, Maroku e nisi ndeshjen me intensitet të lartë, duke ushtruar presion të vazhdueshëm në zonën kundërshtare që në minutat e para.

Dominimi u konkretizua në minutën e 26-të, kur Brahim Díaz shënoi golin e epërsisë, duke regjistruar golin e tij të pestë në turne. “Atlas Lions” vazhduan të krijojnë raste edhe para pushimit, por pa arritur ta dyfishojnë rezultatin. Në pjesën e dytë, Kameruni u përpoq të reagonte duke mbajtur më shumë topin, por pa qenë realisht i rrezikshëm në sulm.

Maroku mbeti skuadra më e organizuar dhe më kërcënuese, duke kontrolluar ritmin e lojës dhe duke mos i lejuar “Luanët e Papërkulur” të rikthehen në ndeshje. Goli i sigurisë erdhi 16 minuta para fundit, kur Ismael Saibari shfrytëzoi një krosim të Abde Ezzalzoulit dhe realizoi me një goditje të bukur me të majtën.

Me këtë sukses, Maroku konfirmon formën e shkëlqyer dhe zgjat serinë e ndeshjeve pa humbje në 22 takime radhazi. Tashmë, vendasit presin me optimizëm gjysmëfinalen, ku do të përballen me fituesin e çiftit Nigeri–Algjeri, duke mbajtur gjallë ëndrrën për triumfin afrikan në shtëpi.