Përmbytjet/ Shpërthen banori: Me 5000 euro e zgjidh vetë problemin e kanalit, por nuk më lënë
Situata vijon të jetë e rëndë edhe gjatë ditës së sotme në Gramëz dhe Sukth Vendas, njësia Thumanë, Bashkia Krujë, si pasojë e reshjeve të shiut që kanë përfshirë vendin gjatë 24 orëve të fundit.
Banorët ankohen se nuk ka pasur asnjë interesim nga bashkia e as nga emergjencat civile.
Shtëpitë ndodhen nën ujë dhe totalisht të izoluara. Gjithashtu dhe bagëtitë dhe ushqimi i tyre janë nën ujë.
Një banor i zonës ka shprehur indinjatën e thellë në lidhje me një problem të kahershëm me një kanal vaditës, i cili sipas tij po shkakton dëme të konsiderueshme dhe humbje uji.
Gjatë një prononcimi me deputetin e PD-së, Gent Strazimiri, ai shpjegon se zgjidhja është e thjeshtë dhe me kosto të ulët, por has në indiferencën e institucioneve.
Sipas banorit, problemi qëndron te bllokimi dhe rrjedhja e pamjaftueshme e ujit. Ai propozon një zgjidhje teknike konkrete: instalimin e katër tubave të mëdhenj prej betoni që do të kalonin ujin, duke eliminuar bllokimet dhe llumin. "Ne duam katër tuba të mëdha këtu, të lirohet kjo dhe 50% e ujit që kemi hedhur ne, do të ishte shpëtuar," thekson ai, duke shtuar se një ndërhyrje e tillë do të eliminonte mbi gjysmën e sasisë së ujit që aktualisht shkon dëm.
Sipas tij, e gjithë puna mund të kryhet me një fond prej 5000 eurosh.
"Kjo punë bëhet për një ditë punë, me 5000 euro. Mund ta bëj dhe unë privatisht, por nuk më lejohet," shprehet ai, duke treguar gatishmërinë për ta financuar vetë zgjidhjen.
Për të mbështetur argumentin e tij, ai sjell si shembull një punë të ngjashme që ka kryer vetë 15 vite më parë.
"Që e kam bërë para 15 vjetësh... Kanali është bërë me beton dhe pas 50 vjetësh nuk prishet," pohon banori, duke dëshmuar se zgjidhjet afatgjata janë të mundshme dhe të përballueshme.
Në fund, apeli i tij mbetet i qartë: një ndërhyrje e vogël dhe e shpejtë mund t'i japë fund një problemi që dëmton bujqësinë dhe shpërdoron një pasuri jetike si uji, por bllokimi burokratik po e mban peng zgjidhjen.