'Situatë e paprecedentë'/ Shehaj: Gjirokastra u 'mbyt' brenda pak minutash, dëme të pallogaritshme

Qyteti i Gjirokastrës është gdhirë nën ujë pas reshjeve intensive të shiut që, megjithëse zgjatën për pak kohë, shkaktuan një situatë të paprecedentë përmbytjesh. Rrugët kryesore dhe lagje të tëra u kthyen në lumenj të rrëmbyeshëm brenda pak minutash, duke përhapur panik mes banorëve dhe duke shkaktuar dëme materiale masive në biznese dhe banesa.

Gazetarja Ervina Shehaj e përshkruan situatën si alarmante dhe kritike. Ajo raporton se ngjarja ishte e pabesueshme dhe e paparashikuar, pasi uji vërshoi me një shpejtësi marramendëse. Shumë qytetarë mbetën të izoluar në banesat e tyre, pasi dalja ishte e pamundur për shkak të nivelit të lartë të ujit. Prania e ushtrisë në terren dëshmon për seriozitetin e situatës, ndërkohë që pronarët e bizneseve janë parë duke bërë përpjekje të dëshpëruara për të shpëtuar çfarë të mundnin nga malli i tyre. Ndërkohë që moti i keq është faktori nismëtar, shkaqet e vërteta të kësaj katastrofe duket se janë më të thella.

Sipas raportimeve të Shehajt, shkaku kryesor i përmbytjeve dyshohet të jetë mungesa e pastrimit të kanaleve kulluese dhe pusetave. Këto janë masa minimale mirëmbajtjeje që, nëse do të ishin marrë paraprakisht, mund të kishin parandaluar ose zbutur ndjeshëm pasojat. Kjo situatë ngre pikëpyetje serioze mbi përgjegjësinë e autoriteteve lokale, sidomos duke pasur parasysh se mbledhje ishin zhvilluar më herët në prefekturë pikërisht për menaxhimin e emergjencave.

Pasojat ekonomike pritet të jenë të rënda. Bizneset përgjatë bulevardit kryesor dhe zonave të tjera të prekura kanë pësuar dëme të pallogaritshme dhe dëmshpërblimi i tyre duket një sfidë thuajse e pamundur. Ndërkohë, në opinionin publik janë rikthyer në vëmendje raportimet e mëhershme për abuzime me tenderat e bordeve të kullimit dhe kanalizimeve në qarkun e Gjirokastrës, duke shtuar dyshimet për një problem sistemik neglizhence dhe keqmenaxhimi. 

Ervina Shehaj:

Po po, shumë pak. Në fakt Flavio, ne dje kemi qenë gjatë gjithë kohës në monitorim të situatës për shkak të punës dhe ishte e pabesueshme si ndodhi vetëm në disa minuta, uji vërshoi në rrugë dhe gjithçka u përmbyt. Pra ishte diçka e paparashikuar. Ashtu siç e thashë, 2017 ka qenë që ka pasur përmbytje në Gjirokastër, por jo të këtij niveli.

Përsa i përket inxhinierëve pastaj apo komunikimit që mund të kemi pasur, mund të themi se kemi një mungesë të informacionit pasi askush nuk ka në mendje derisa të paktën situata të stabilizohet dhe pastaj të gjenden shkaktarët. Është shumë e thjeshtë. Këto problematika apo vërshimi i ujit janë, të paktën minimumi që duhej të ishte bërë, ishin pastrimet e e kanaleve, të pusetave.

Këto janë masat minimale që mund të merreshin paraprakisht sepse edhe pse janë zhvilluar mbledhje në prefekturë më përpara. Unë nuk e di se çfarë kanë diskutuar përsa i përket situatave emergjente, pasi situata është kjo që duket.

Ushtria në terren, panik tek njerëzit, tek të gjithë banorët, pasi dje ka qenë e pamundur të dilje nga banesat. Unë personalisht kam qenë e izoluar në banesën time pasi uji vërshonte përpara pallatit dhe ishte e pamundur për të dalë në në terren.

Përsa i përket tenderave, për aq kohë sa unë të paktën s'kam asnjë gjë të faktuar, nuk mund të bëj një koment personal lidhur me këtë situatë. Problematikat janë evidente dhe shihen. Shkaqet patjetër që duhet të dalin dhe duhet të ketë një hetim madje të të gjithë kësaj situate që ndodhet sot në qytetin e Gjirokastrës dhe dëmi që i është shkaktuar banorëve.

Është e pamundur që këto biznese të cilat operojnë në bulevardin e lagjes 18 Shtatori deri tek ura e lumit të dëmshpërblehen me këto dëme kaq të mëdha që i kanë shkaktuar këto përmbytje. Kanë qenë vetë pronarët të cilët dalin anës rrugës, kanë vendosur prita për ta shmangur sadopak, por që ishte e pamundur. Le të shpresojmë që ky të jetë një mësim i mirë për të gjithë drejtuesit dhe për të gjithë pushtetin përsa i përket qarkut të Gjirokastrës dhe mbarë vendit.

Por në Gjirokastër ka gjalluar panik sepse kjo situatë është për herë të parë dhe banorët nuk janë ndeshur ndonjëherë. Kemi pasur makina, automjete të cilat i ka marrë rrjedha e ujit, vërshimi i ujit, të cilat kanë qenë të parkuara dhe që s'mundeshe dot t'i parandaloje. Pra situata është alarmante dhe kritike dhe nuk dihet se si do të jetë në orët në vijim. Ne patjetër që do të vazhdojmë dhe do të qëndrojmë pranë bizneseve për të parë edhe nga afër të gjitha dëmet e shkaktuara nga kjo përmbytje.