‘Shqiptarët përcaktojnë çmimin e kokainës’/ Gazeta e Brukselit: Si u zhvendos lufta e klaneve Çopja-Alibej në Belgjikë

BRUXELLES TODAY

Këtë të hënë, më 5 janar, juria e Gjykatës së Krimeve të Rënda të Brukselit do të formohet për të ndjekur gjyqin e porositësve të dyshuar të vrasjes së Ardit Spahiut, një shqiptar 38-vjeçar. Trupi i tij u gjet i pajetë më 27 nëntor 2020 në një hapësirë të gjelbër në shëtitoren ‘Condor’, në Molenbeek, pranë rrugës ‘Des Bougainvillées’. Gjurmët tregonin se viktima kishte tentuar të arratisej. Ai ndërroi jetë si pasojë e plumbave të shumtë në pjesën e pasme të trupit. Në vendngjarje u gjetën 18 gëzhoja kalibri 9 mm.

Dosja u ndërtua në sfondin e një lufte klanesh shqiptare, të njohura në rrjetet e trafikut të kokainës. Nga nëntë të akuzuarit, disa janë ende në arrati, përfshirë M.Q., një nga porositësit e dyshuar të kësaj vrasjeje. Franc Gergely, i njohur me nofkën Çopja, ndodhet në bankën e të akuzuarve. Ai i mohon faktet që i atribuohen, ndonëse ndodhet në qendër të këtij procesi.

Trafik ndërkombëtar

Sipas elementeve të dosjes të trajtuara nga prokuroria federale dhe të mbledhura nga RTBF, dy autorë të armatosur me armë automatike dyshohet se kanë shënjestruar viktimën në një lagje që është shndërruar në një “hotspot” të drogës. Zona ka qenë shpesh skenë përplasjesh mes bandave rivale. Megjithatë, kjo çështje duket se lidhet më shumë me një rrjet trafiku ndërkombëtar sesa me një konflikt të thjeshtë për kontrollin e pikave të shitjes.

Të gjithë personat e marrë në pyetje janë treguar veçanërisht të heshtur, nga frika e hakmarrjes. Një person ka pranuar më në fund të flasë dhe tani përfiton nga programi i mbrojtjes, së bashku me familjarët e tij.

Ardit Spahiu dyshohet se kishte mbërritur në Belgjikë në vitin 2019 për t’i shpëtuar likuidimeve të tjera në Shqipëri. Ai thuhet se kishte punuar në laboratorë klandestinë për përpunimin dhe prerjen e kokainës. Ditën e vrasjes, ai duhej të takonte një mik, E.C., në pyllin e Cambre. Ky i fundit dyshohet se u kishte dhënë vrasësve informacion mbi lëvizjet e Ardit Spahiut. E.C. ka deklaruar se ka vepruar nën presionin e kërcënimeve ndaj vetes dhe familjes së tij.

Një vrasje e porositur nga distanca

Përtej dëshmive, janë mbi të gjitha shkëmbimet në platformën e koduar Sky ECC që kanë lejuar ndërtimin e pjesës kryesore të dosjes, përfshirë organigramin e një organizate kriminale. Aty shfaqen role të ndryshme, nga logjistët te ekzekutorët, deri te porositësit. Mijëra euro mund të paguheshin për eliminimin e një personi, shpesh një konkurrent. Sipas mesazheve, Ardit Spahiu kishte shpëtuar nga disa tentativa vrasjeje.

Franc Gergely, i njohur si Franc Çopja, konsiderohet si porositësi kryesor. Ai dyshohet se ka vepruar së bashku me një ortak, M.Q.. Të dy personat dyshohet se janë të vendosur në Dubai.

Një vjedhje ngarkese

Franc Çopja, së bashku me vëllanë e tij, dyshohet se ka zhvilluar aktivitete të shumta trafiku droge në Itali, Holandë, Mbretërinë e Bashkuar dhe Belgjikë. Në vitin 2017 ose 2018, një vjedhje e një ngarkese kokaine në Londër dyshohet se ka qenë shkaku i konfliktit mes familjeve Çopja dhe Alibej-Spahiu. Shpejt, familja Çopja u imponua si “një nga organizatat shqiptare më të fuqishme aktive në trafikun ndërkombëtar të kokainës”, sipas SPAK-ut, prokurorisë shqiptare të specializuar kundër korrupsionit dhe krimit të organizuar.

Deri në çmontimin e tij në vitin 2025, klani dispononte një fuqi ndikimi të konsiderueshme dhe ishte në gjendje të ndikonte në çmimet e tregut të kokainës. Rrjeti sillte drogën përmes portit të Anversës, me origjinë nga Amerika Latine.