Fundi i Ramës si i Maduros! Zhulali: Janë si dy pika uji, kryeministri është i zënë mat

Zhvillimet e fundit në Venezuelë, kanë hapur një debat mbi një paralelizëm të mundshëm me situatën politike në Shqipëri.

Ekspertja e Çështjeve Ndërkombëtare, Ilda Zhulali e ftuar në studion e Task Forcë në Syri Tv thotë se si Maduro, edhe kryeministri Edi Rama ka marrë një paralajmërim të qartë dhe se ndodhet përballë një prove vendimtare: të tërhiqet apo të përballet me pasoja të rënda.

Ndonëse Shqipëria dhe Venezuela janë kontekste të ndryshme gjeopolitike, në Aktin Kombëtar të Mbrojtjes të SHBA-së e përcaktohet se Shqipëria dhe Ballkani Perëndimor janë një përparësi strategjike. Kjo nënkupton se çdo kërcënim ndaj interesave amerikane në rajon konsiderohet si një sulm i drejtpërdrejtë ndaj sigurisë kombëtare të Amerikës.

Në këtë kontekst, imazhi i Shqipërisë si një "narko-shtet", i pasqyruar gjerësisht në mediat ndërkombëtare, përbën një shqetësim madhor. Situata bëhet edhe më alarmante kur përmenden lidhje të drejtpërdrejta të niveleve të larta të qeverisjes me krimin e organizuar ndërkombëtar. Një shembull konkret është fakti se një familje e shpallur "non-grata" nga SHBA për lidhje me kartelin famëkeq meksikan Sinaloa, i cili konsiderohet organizatë terroriste, rezulton të ketë pasur akses deri në rezidencën kryeministrore.

Përtej kësaj, shtrohen pyetje kritike mbi kontrollin e aseteve strategjike të vendit.  Kush kontrollon sektorin e energjisë, infrastrukturën kritike dhe, më e rëndësishmja, kush i zotëron të dhënat shtetërore të një vendi anëtar të NATO-s? janë pyetjet që ngriti Zhulali e ftuar në studion e Sonila Meços. 

Fjala në studio e Ilda Zhulalit

Unë mendoj që si Madura dhe Rama e ka marrë paralajmërimin e tij. Pyetja është çfarë do të bëjë Rama me këtë paralajmërim? Sepse mendoj që mesazhi është dhënë prej kohësh Edi Ramës, shumë qartë, siç i ishte dhënë dhe Maduros. Edhe Maduros ju dha kohë që të reflektonte mbi mbi atë çfarë ju bë ofertë, që të hiqte dorë nga disa gjëra, po ai zgjodhi që të qëndrojë.

Tani Edi Rama është në testimin e vet, me kohën, nëse do të dorëzohet, apo do të qëndrojë dhe me çfarë çmimi do ta bëjë këtë. Por që ka ngjashmëri, ajo as që diskutohet. Jo vetëm ngjashmëri, por janë gati si dy pika uji.

Ata që janë skeptikë sot duan që të ngrejnë një vijë paralele  ose të ndërtojnë një kontrast me faktin se që Venezuela është një vend i madh dhe ka rëndësi të madhe për Amerikën sepse ndodhet në kopshtin amerikan, pavarësisht se Maduro u përpoq ta shndërronte në çerdhe të kundërshtarëve apo armiqve të Amerikës, ndërsa Shqipëria është shumë larg, Shqipëria është në Europë edhe është shumë e vogël.

Megjithatë, përsëri për këtë e ka dhënë vetë përgjigjen Trump, pasi në Aktin Kombëtar të Mbrojtjes, Shqipëria dhe Ballkani Perëndimor janë futur si përparësi strategjike e Amerikës, ku duhen mbrojtur interesat e sigurisë amerikane. Pra, çdo centimetër ku cënohen interesat amerikane, cënohet drejtëpërdrejtë siguria kombëtare amerikane.

Tani, a është e cënuar kjo siguri në Shqipëri? Shqipëria cilësohet si narko-shtet, madje si narko-shteti i vetëm në Europë dhe këtë gjë media ndërkombëtare ka bërë kaq shumë jehonë këto muajt e fundit sa nuk ka më.

Përmes të gjitha dritareve të informacionit apo të opinion-bërjes politike amerikane apo europiane, kjo ka zënë vend. Po ashtu kjo nuk ka lindur rastësisht, ka ardhur përmes agjencive ligjzbatuese të këtyre vendeve. Po ashtu kemi për shembull, një familje shqiptare që ka qenë në shtëpinë kryeministrore të Edi Ramës, është tashmë e shpallur non-grata si, një pjesë e kartelit ose si bashkëpunëtore e Sinaloas.

Sinaloa po ashtu është cilësuar si një organizatë terroriste që kërcënon drejtpërdrejtë interesat e Shteteve të Bashkuara të Amerikës. Por jo vetëm kaq. Sot në Shqipëri ka dy pyetje të mëdha. E para, kush qëndron pas burimeve strategjike në Shqipëri, të energjisë, kush qëndron pas infrastrukturës strategjike në Shqipëri?

Ajo qw është elefanti gjigand në dhomën tonë, është kush ka në dorë sot të gjithë të dhënat shtetërore të shtetit shqiptar, vend anëtar i NATO-s? Dhe çfarë bën me këto të dhëna? Pra, kujt ja ka shitur Edi Rama dhe cilat pjesë ja ka shitur, cilëve aktorë, përmes këtyre të dhënave shtetërore. Kështu që mendoj që Edi Rama e ka plotësuar gjithë këtë ciklin.

Vërtetë shumë vendeve ose interlokutorëve të huaj po t'i thuash që u kap një kryeministër apo një zëvëndës-kryeministër në korrupsion, thotë po mirë, korrupsion ka dhe në vend tjetër. Po u kap një kryetar bashkie. Po mirë thonë, ka edhe kryetar bashkish në vende të tjera. Por kur i mbledh të gjithë këto elementët e tjerë bashkë, këtu Edi Rama është i zënë mat. Dhe siç e kemi paralajmëruar kaq herë, unë besoj që në këtë zënie mat, ai është bashkë me Vuçiçin, sepse bashkë hynë në këtë lojën e madhe politike.